Gurean gaur

Iñaki Barcena eta Maitane Arri: “Energia aukerak murrizten dabiltza eta horretarako prestatu behar gara”

Energia baliabideak eta materiala amaitzen ari direla ikusten ari gara, eta bioaniztasuna galtzearekin batera klima aldaketaren lehenengo zantzuak antzematen ari gara. Testuinguru honetan, kapitalismoarenak diren ekoizpen eta kontsumo ohiturekin jarraitzen badugu, sistemaren krisia bizkortu besterik ez dugula egingo ziurtatu dute Iñaki Barcena eta Maitane Arri Ekologistak Martxan elkarteko kideek. Biosfera krisi sakonean aurkitzen da, eta kapitalismo globala bera ere dituen mugetara iristen ari dela azaldu dute. Hala, arrakalei eta alternatibei heldu diete biek.

Gipuzkoa eremu gorritik laranjara igaro da

Azken 24 orduetan, EAEn 519 positibo berri atzeman dituzte, 10.140 test diagnostiko egin ondoren, eta positibotasun tasa %5,1ekoa da. Lurraldeka aztertuz, Araban 103 detektatu dituzte, Bizkaian 208 eta Gipuzkoan 205. Azpimarratzekoa da gainera, Gipuzkoa ere eremu gorritik laranjara igaro dela, eta beraz, EAEko hiru lurraldeak eremu horretan kokatzen dira uneotan.

Gizarteak euskararekiko duen herri-gogoa Euskaraldirako hauspoa izan da

Gaur amaitzen da Euskaraldiaren bigarren edizioa. Urte honetan egondako zailtasunek antolaketa prozesuan eta ariketa sozialaren beraren garapenean eragin nabarmena izan duten arren, gizarteak euskararekiko duen herri-gogoa ariketarako hauspoa izan dela azaldu dute antolatzaileek; eta batzorde eta entitateek egindako lana eskertu dute.

Hungariari eta Poloniari izkin egin nahi die Europar Batasunak

Hungaria eta Polonia aintzat hartuko ez dituen diru funts bat martxan jartzeko aukerak aztertzen ari da Europar Batasuna. Covid-19ari aurre egiteko diru laguntzak jaso ahal izateko ezinbesteko baldintzatzat jo zuen Bruselak “zuzenbide estatu”-a errespetatzea, baina ekialdeko bi estatuak beldur dira artikulu hori euren aurka erabiliko ote den eta horregatik betoa jarri diote mekanismo osoari. Funts hori bakarrik ez, datozen 7 urteetarako aurrekontua ere blokeatuta dago uneotan beto hori dela eta.

Azkeneko bi egunetan positibotasunak gora egin du eta COVID19ak jota 83 gaixo berri zenbatu dituzte

“2020: pandemiaren oihartzunak” dokumentala estreinatu du Nafarroako Gobernuak eta izurriteak Foru Erkidegoan izandako eragina herritarren zuzeneko lekukotzaren bitartez azaltzen du. Gertatutakoa oroitzeko eta etorkizunerako kontakizuna gordetzeko osatu dute lana.

Irla batera eraman nahi ditu errefuxiatu Rohinyak Bangladeshek

Errefuxiatu Rohinyak Bhasan Char irlara bidaltzeari ekin dio Bangladesheko gobernuak. Irlaren izenak berak argi uzten du honen nolakotasuna. Bhasan Char izenak “flotatzen ari den irla” esan nahi du, eta ez da kasualitatez jarritako izena. Duela bi hamarkada oraindik lurpean zegoen irla bat da, eta apenas gainditzen du itsasoaren maila. Antza denez Ganges eta Brahmaputra ibaien sedimentuek osatutako irla bat da eta 50 km karratu ditu guztira.
hamaika telebista

Image