Gurean gaur

Vero Satrustegi: "Perun eta Argentinako hainbat goi kargudunek txertoa jaso dute ez zegokienean"

Veronica Satrustegi Perun bizi den kazetaria elkarrizketatu dugu Hamaika Telebistan, Hego Amerikako gaurkotasunaren berri emateko. Koronabirusaren kutsatzeen gorakada betean, lurrikara politiko bati aurre egin beharko dio Peruk, txertaketen eskandalua dela eta. Argentinan ere goi kargudunek, presidenteak eta osasun ministroak txertoa hartu dute, eta erabilera pribaturako Sputnik txertoaren 3.000 txerto jaso dituztela azaldu du.

Haitín ere krisi instituzional betean daude. Oposizioko kideek "diktadoretzat" jo dute Moise presidentea, eta bere agintaldia amaitu dela diote. Presidenteak, ordea, esan du urtebete falta zaiola agintaldia amaitzeko. Samir Flores Mexikoko aktibista indigena erail zuten bigarren urteurrenean, kasua argitu gabe dagoela nabarmendu du Satrustegik, eta Kolonbiako gatazkari dagokionean, oraindik ere egia bilatzen ari direla nabarmendu du kazetariak. Herrialdeko Bake Auzitegiak 6.400 'positibo faltsu' baino gehiago jaso ditu Uribe Gobernuan zegoen bitartean.

Iosu Ganuza: "Ikerketzen ari dira oharkabean piztutako edo nahita egindako sutea izan ote zen"

Iosu Ganuza Iruñeko berriemailea izan dugu Hamaika Telebistan, Nafarroako gaurkotasunaren berri emateko. Azagran bere bikotekideak erasotu zuen emakumea larri dagoela nabarmendu du, eta asteburuan Bidasoaldean gertatu zen suteari buruzko azken berriak, zein COVID10ak eragindako pandemiaren bilakaerari buruzko azken datuak ere jaso ditugu.

Berta Legarra: "Musukoarekin komunikazioa zaila da ume gorrentzat"

Berta Legarra Ulertuz elkarteko arduraduna elkarrizketatu dugu Hamaika Telebistan. Bizipoza proiektuaren barruan, beren bideoklipa argitaratu dute gaur. Ume gorren errealitateaz eta COVID19ak eragindako pandemia egoeran dituzten zailtasunei buruz aritu da Legarra. Adierazi du ezpainak irakurtzen dituztela normalean, eta maskarillaren erabilerak komunikazioa zaildu duela.

Osakidetza Arabako, Bizkaiko eta Gipuzkoako nagusienen txertaketarekin hasi da

Txertoa jasotzeko, ahal dela, osasun-zentrora bertara joan beharko da. Horretarako, 25 txertaketa-gune inguru identifikatu dituzte, eta kopuru hori beharren arabera handitu ahalko dela adierazi dute. Edonola ere, lurralde bakoitzeko gune bat ezarri da, nagusiak ibilgailuan joan daitezen eta ibilgailutik irten gabe, txertoaren lehen dosia jar dezaten.

Ipar Euskal Herriko ikasleek hilekorako produktuak doan izango dituzte unibertsitateetan

Hurrengo ikasturtetik aurrera, Ipar Euskal Herriko ikasleek hilekorako produktu higienikoak doan izango dituzte unibertsitateetan. Hala iragarri zuen atzo Frederique Vidal Frantziako Goi Irakaskuntza eta Berrikuntza ministroak. Neurri horren bidez, pobrezia menstrualari aurre egitea da asmoa.
hamaika telebista

Image