Zea Mays: "Diska honekin bizitzeko eta musika egiteko dugun egarri hori kontatu nahi izan dugu"
Elkarrizketa
Zea Mays taldeko kideak gurean izan dira gaur, argitaratu berri duten Egarria diskoaz hitz egiteko. Bizkaitar taldeak bere ibilbidean beste urrats bat egin du lan berri honekin, eta diskoaren sormen-prozesua, abestien atzean dauden mezuak eta musikarekiko duten pasioa izan ditugu hizpide.
Urte luzez oholtza gainean eta musikagintzan murgilduta ibili ostean, sortzeko eta gauza berriak kontatzeko gogoz jarraitzen du Zea Maysek. Hain zuzen ere, grina hori islatu nahi izan dute Egarria diskoan: bizitzeko, sortzeko, esperimentatzeko eta musikaren bidez emozioak partekatzeko duten beharra. Taldearen nortasunari eutsiz, soinu eta ideia berriak lantzeko aukera eman die lan honek.
Elkarrizketan, disko berriaren sorrera nolakoa izan den, urte hauetan taldeak izan duen bilakaera eta elkarrekin musika egiten jarraitzeko motibazioa izan ditugu hizpide. Era berean, gaur egungo musikagintzaz, denboraren joanaz eta abestien bidez entzuleekin sortzen duten loturaz ere aritu gara.
Etorkizunera begira ere jarri gara, 2027aren hasieran abiatuko duten aurkezpen-bira izango baitute hurrengo erronka nagusia. Besteak beste, maiatzaren 1ean Bilboko Santana 27 aretoan eskainiko duten kontzertuaz eta abesti berriak zuzenean aurkezteko duten gogoz hitz egin dugu.

















