Joxerra Senar Berriako kazetariak Caparrosoko makrobehitegiaren inguruko gakoak eman dizkigu, makroetxaldeen eztabaida bizi-bizirik dagoen egunotan.
Instalazio handi hauek duela hamabi urte ezarri ziren Nafarroan, UPNren Gobernuak ingurumen baimena eman ondotik. Hala ere, makrobehitegia kudeatzen duen enpresaren aurka hamaika espediente ireki ditu Nafarroako Gobernuak, irregularitateak direla eta. Azken hamarkada honetan ingurumenean eragin duen kalteaz ere ohartarazi du.

Vero Satrustegi kazetariak 2022.urtean Hego Amerikak oro har izango dituen erronkei buruz analisia egin du. Batetik, hauteskunde erronda berria zabalduko da herrialde desberdinetan, bloke progresista indartzeko aukerarekin. Bestetik, abortuaren eskubidean oraindik ere bidea egiteke dagoela azaleratu du kazetariak. Azkenik, covid19 izurriak eta zehatzago, Omicron aldaerak ekarritako ondorioei aurre egiteko erronkei buruz aritu da.

Niko Cuenca ekonomialariarekin aztertu dugu 2022.urteak dakarrena ekonomia alorrean; inflazioaren kausak eta bilakaera; herritarren eros ahalmenaren beherakada, lan hitzarmenen berrikuntza eta langabezia datuak aztertu ditu Cuencak.

Garikoitz Nazabal, EHNE Gipuzkoako presidentearekin aztertu dugu Euskal Herriko nekazarien egoera. Ohartarazi dute "sektorerik gabe" gelditzen ari dela Hego Euskal Herria; produkzio kosteak "nabarmen" igo direlako, batez ere abeltzainen kasuan pentsuaren prezioa ere igo delako, baina azken produktuen prezioa berdina jarraitzen izaten du. Protestak iragarri dituzte datozen asteetarako.

Gabonen atariak ekarri dizkigu Irati Agirreazkuenaga aktoreak kultur proposamen batzuk; alde batetik, Gasteizen egingo den '150 gramo' arte eszenikoen jaialdia, bertan ikusgai izango diren antzezlan batzuk nabarmendu ditu. Bestetik, gaur bertan Bilboko BIRA kulturgunean estreinatuko den 'Istanbul' ikuskizun literarioa eta migrazioekiko begirada tragikomikoa, Lutxo Egiaren azken lana.

Zaldibarko zabortegia hizpide izango dugu jarraian. Aste honetan ingurumen delituagatik deklaratzera deituak zeuden Verter Reciclying enpresako arduradunak; ez dute deklaratu. Auzi hau aztertu du Zaldibar Argituko kidea den Gaizka Zabartek.

Lehen Arretaren "egoera jasanezina" salatzeko protestak egiin dituzte EAEko osasun zentroen aurrean. Maitena Larrañaga SATSEko kideak eman digu aldarrikapenen berri.

Hego Euskal Herriko erakunde nagusietan Berdintasunerako barne planen egoeraren inguruko txostena aurkeztu du LAB sindikatuko Idazkaritza Feministak. Eli Etxeberria da kide horietako bat eta berarekin aztertu ditugu txostenaren ondorioak.

Gabriel Boric Apruebo Dignidad koalizioko hautagaiak garaipen argia eskuratu zuen igandean Txileko hauteskundeetan, 2021eko hauteskundeetan Latinoamerikako olatu ezkertiarrera batuz. Hemendik aurrera herrialdeak izango dituen erronkak aztertzeko elkarrizketatu dugu Asier Blas politologoa eta EHUko irakaslea.