Gaur hil den Valéry Giscard d'Estaing presidente ohi frantziarrari buruz hizketan ekin diogu gaurkoari Eguzki Urteagarekin. Horrez gain, Estatu frantziarrean gertatzen den hizkuntza eta azentu diskriminazioari buruz ere hitz egin dugu, eta baita zientzia arloan ere euskara erabiltzearen garrantziari buruz ere.

2021eko Espainiako aurrekontuak onartzeko lehen bozketa egin da gaur Madrileko Kongresuan. Inbestiduran baino aldeko bozka gehiago lortu ditu koalizio gobernuak. Madrildik bertatik Iñigo Aduriz kazetariak azaldu digu aurrekontuak onartu izanak arnasbide bat ematen dio Gobernuari. Horrez gain, Botere Judizialaren Kontseilu Orokorra berritzeko dagoen blokeoari buruz ere jardun dugu.

Covid-19a Italian izaten ari den eraginari buruz hitz egin dugu Ane Irazabal kazetariarekin. Azaldu digu Italiako gobernuak Gabonetarako ezarri dituen neurriak ez direla orain arte mantendutakoak baino arinagoak izango, hirugarren olatu batek beldur handia eragiten duela-eta. Aldi berean baina, aitortu digu ederra dela Erroma turista uholderik gabe bizitzea. Bere esanetan, erromatarrek berriz ere "Erroma berreskuratu dute", honek eragingo duen kalte ekonomikoa ere aintzat hartzekoa den arren.

Covid-19aren kontrako txertoari buruz hizketan ekin diogu Beñat Zalduarekin astero egin ohi dugun tarteari. Azpimarratu digu bereziki garrantzitsua dela herritarrei azaltzea Covid-19aren aurkako txerto hauek ohi baino azkarrago garatu diren arren txerto guztien segurtasun neurri berberak bete dituztela. Horrez gain, Zubietako erraustegiari buruz ere hitz egin dugu. Bestalde, Jaurlaritzak uko egin dio erraustegiak behar duen baimen bat berritzeari. Zalduak nabarmendu du erraustegian erretako hondakinak ez direla argindarra sortzeko erabiltzen ari, hori izan zen arren instalakuntza hau zuritu edo "berdetzeko" erabili zen argudioa.

Azken aldian Amerika Erdialdean izaten ari diren uholdeak aintzat hartuta ekin diogu Alberto Pradillaren lehen kolaborazioari. Uholde horiek ingurua are gehiago txirotuko dutela uste du kazetariak, eta horrek migrazioa areagotu dezakeela. Migrazioari buruz, hain justu, eskualdeko gobernuek izandako jarrera kritikatu du, euren politikak Trumpen harresiaren parte bihurtu zirela azalduz. Amaitzeko, Guatemalan izaten ari diren protestei buruz hitz egin digu.

Gaur publiko egindako Gazteen Euskal Behatokiaren inkestari buruz hitz egin digu Estitxu Garaik. Azpimarratu du pandemian gazteak oso modu gogorrean kriminalizatu direla, eta inkesta honen emaitzek argi uzten dutela gazteak ez direla erakutsi nahi izan den bezalakoak. Horrez gain, Iñaki Garcinuño Bizkaiko Patronaleko presidenteak ERTEan dituzten langileak kaleratzeko egindako eskariari buruz jardun dugu, eta baita Gabonei begira iragartzen ari diren neurriez ere.

Covid-19aren aurkako neurrien inguruan ostalariek eta kultur munduko langileek Ipar Euskal Herrian izaten egindako protesta eta mobilizazioei buruz hitz egin dugu Oihana Teyseirerekin. Dendak dagoeneko ireki ahal izan dituzte bertan, baina neurri zorrotzak ezarrita. Horrez gain, Parisek onartu nahi duen segurtasun lege berriari buruz ere hitz egin dugu. 24. artikulua, poliziak grabatzea debekatuko zukeena, berridatzi egingo duela adierazi du gaur bertan parlamentuak, baina Teyseirek azaldu digu ikusi egin beharko dela aldatzen dena edukia edo forma den. Ipar Euskal Herrian jarraituz, bakegileek abenduaren 19rako deitua zuten mobilizazioa bertan behera utzi dutela ere kontatu digu, 'Xistor' Haranburu aske geratu ondoren.

Ipar Euskal herrian deskonfinamentu prozesua nolakoa izango den azaldu digu Eguzki Urteagak. 3 fasetan banatuko da eta Hego Euskal Herrian baino arinagoa eguberrietan. Horrez gain, datorren astean beteko dira 50 urte Brugosko prozesua egin zenetik. Epaiketa hark Euskal Herrian izan zuen eraginari buruz eta euskal gatazka nazioartera proiktatzerakoan izan zuen garrantziari buruz ere hitz egin dugu. Amaitzeko, Europar Batasunak migratzaileak gizarteratzeko aurkeztu asmo dituen planei buruz jardun dugu.

Indarkeria matxistari buruz eta honen aurrean egunero borrokatzearen garrantziari buruz hitz egin dugu Iraia Oiarzabalekin. Atzo izan zen Emakumeen kontrako indarkeriaren aurkako nazioarteko eguna, eta halako egunez gain, borroka egunero mantendu behar dela aldarrikatu digu. Horrez gain, Naiz.eus-en egindako aldaketei buruz ere hitz egin dugu. Aldaketa estetikatik askoz harago doala azaldu digu.