Mundua

All Stories

Kataluniako preso politikoei "lehenbailehen" indultua emateko eskatu du Podemosek

Preso independentistak aske uzteko eskatu dio Jaume Asens en Comun Podem alderdiko bozeramaileak Juan Carlos Campo Espainiako Justizia ministroari. Indultuaren bitartez edo sedizio delituaren erreformaren bidez presoak askatzea eskatu du. Bitartean, presoen hirugarren gradua baliogabetuko duen ala ez ebazten ari da Auzitegi Gorena, baina ziurtzat jotzen da erregimen zorrotzagoa ezarriko diela presoei.

%40 egingo du gora laguntza humanitarioa behar dutenen kopuruak

Datorren urtean %40 egingo du gora munduan laguntza humanitarioa behar dutenen kopuruak. Covid-19ak eragindako krisiaz gain, krisi klimatikoa eta gatazka armatuak dira igoera horren arrazoia. Zifra zehatzetan, gutxienez 235 milioi pertsona izango dira, eta Nazio Batuen Erakundeak 35.000 milioi dolar eskatu ditu egoerari aurre egiteko.

Koronabirusaren aurkako txertoa, geroz eta gertuago

Moderna, Pfizer eta BionTech farmazeutikek txertoak merkataratzeko baimena eskatu diote Europako Sendagaien Agentziari. Txertoen aurrerapenek eta Covid-19 kutsatzeen beherakadak merkatuetan bultzada eta baikortasuna sortu dute, Ibex35ak inoizko hilabeterik onena sinatu du azaroan.

Iranek Israeli egotzi dio zientzialari nuklearraren hilketaren erantzunkizuna

Israeli eta oposizioko talde bati egozten dio Iranek zientzialari nuklear baten hilketa. Hasiera batean erasoa ibilgailu batean zihoazen bost gizon armatuk egin zutela zabaldu zen arren, orduek aurrera egin ahala nabarmen aldatu da gertatutakoari buruzko bertsio ofiziala. Azken bertsioaren arabera modu telematikoan kontrolatutako metraileta batekin hil zuten Moshen Fajrizadeh. Erasoa AEBetan gobernu aldaketa gauzatu baino gutxi lehenago iritsi da. Iranek erasoari erantzuten badio zaildu egingo da Washingtoneko administrazio berriarekin izan dezakeen harremana, eta hortik erantzuna atzeratzeko nahia.

Bin Salmanekin bildu da Netanyahu sekretupean

Benjamin Netanyahu Israelgo lehen ministroa Mohamed Bin salman Saudi Arabiako printze oinordekoarekin bildu da asteburuan Saudi Arabiako Neom hirian. Bidaia sekretupekoa izan den arren Israelgo hedabideek eman dute bidaiaren berri. Kan irratiak "Saudi Arabiarekin harremanak normalizatzeko kontaktuen testuinguruan" kokatu du bidaia. Hala, dagoeneko Arabiar Emirerri Batuek eta Bahreinek hartutako bide bera hartuko luke Ryadek ere.

hamaika telebista

Image