Euskal Herriko mugimendu feministak deituta, milaka emakume kalera atera dira martxoaren 8 honetan, Emakumeen Nazioarteko Egunean, "indarkeriarik gabeko bizitza askeak izateko eskubidea" aldarrikatzeko. Baionan, gogoratzen den manifestazio feministarik jendetsuenetako bat izan da, 1300 pertsona baino gehiago bildu baitira. Euskal Herriko Bilgune Feministak deitutako martxa 17:00etan abiatu da geltokitik 'Faxismoaren aurka, ausardia eta aliantza feministak!' lelopean.