Nafarroako ikuskizun eta ekitaldietako profesionalek greba egingo dute urriaren 10ean, langileentzako laguntza teknikorako lehen hitzarmen autonomikoa exijitzeko. Hala jakinarazi du LABek astelehen honetan egindako prentsaurrekoan. Bertan, patronalaren jarrera salatu dute; izan ere, azaldu dutenez “egoera onartezina da” eta denbora honetan ez dute “aurrerapenik izan”. Hain zuzen ere, sektoreko lehen grebatik bost urte igaro direla nabarmendu dute, eta bi urte lehen hitzarmena negoziatzen hasi zirenetik.
Era berean, aitortu dute patronalak ez dituela lan ordezkaritzaren deiak hartzen eta horregatik mobilizazio sindikalari berriro heltzea erabaki dutela. Ildo horretan, argi utzi dute “isiltasuna ez dela erantzun bat eta negoziatzeko borondate ezak ondorioak dituela”. Langileen arabera, hitzarmen kolektiboak sektorea “ordenatzen lagunduko du” eta “lan bizitza eta bizitza pertsonala uztartzeko aukera” emango du.
Horiek horrela, urriaren 10ean mobilizatuko dira eta sektoreko langile guztiei grebarekin bat egiteko deia egin diete. Jakinarazi dutenez, euren aldarrikapenei erantzuten ez badiete ez dute baztertzen greba egun gehiago egitea.