Urriaren 28tik aurrera lanuzteak egiteko deia luzatu zuten hainbat mediku sindikatuk osatzen duten Greba Batzordeak. Halaber, Gorteak desegin eta azaroaren 29rako hauteskunde orokorrak deitu ostean, greba atzeratzea erabaki dute. Dena dela, sindikatuek ohartarazi dute Espainiako hurrengo Gobernuak euren aldarrikapenei erantzuten ez badie, berriro ere mobilizazioei ekingo dietela.

Arrazoitu dutenez, testuinguru berri honetan negoziatzeko solaskide politikorik gabe utzi ditu mediku eta fakultatiboak, eta, beraz, haien iritziz, “greba mugagabea mantentzeak ahalegin handia eskatuko luke”. Hori horrela, argi utzi dute “greba mugagabearen atzerapena estrategikoa dela, eta ez, aldiz, deialdia bertan behera uztea”.

 Ildo horretan, Espainiako hurrengo Gobernuari medikuen aldarrikapenak helaraziko dizkiotela azpimarratu dute, eta alderdi politikoei ere eskatu diete haien hauteskunde programetan medikuen eskariak kontuan hartzeko.

Urriaren 28an hasi behar zen greba mugagabearen arrazoia Espainiako Osasun ministerioak langile soziosanitario guztientzat aurkeztutako estatutu markoa zen. Sindikatuek nabarmendu dutenez, marko horrek, “ezinegona” sortu du medikuen artean, lan jardunari, kategoria profesionalari eta guardien ordutegi eta ordainketei dagokionez. Grebarekin “Osasun ministerioak bere planteamendua zuzentzea eta benetako negoziazioa” abiatzea lortu nahi zuten, “estatutu mediko propio baterantz aurrera egin ahal izateko”.