Image

Gurean Gaur

All Stories

Argitxu Dufau, LAB: “Macron-en asmoa da indarrean ahal bezain fite paratzea erreforma”

Frantziako Gobernuaren pentsio erreformaren aurka kalera atera dira berriro gaur Baionan. Argitxu Dufau LAB sindikatuko kideak nabarmendu du mobilizatzen jarraituko dutela, eta ez dutela “amore emango” pentsio erreforma bertan behera utzi arte.
Dufauk azaldu du aste honetan hasi direla testua eztabaidatzen, eta zuzenketa anitz pausatu dituztela. Uste du horrek “denbora” emango diela borroka honi segida emateko, Macronen asmoa delako “indarrean ahal bezain fite paratzea erreforma”. Mobilizatzen jarraitu behar dutela dio, Asanblean ere eztabaida hori bideratu behar dutelako, eta langileok “protagonismo osoa” hartu behar dutelako.

Ainhoa Tirapu, ELA: “Patronala ez da eseri ere egin negoziatzera”

Bizkaiko adinekoen egoitzetako langileak iazko 21 eguneko grebari segida ematen ari dira, eta zazpi eguneko greba egiten ari dira ELA sindikatuak deituta, otsailaren 1ean hasi eta bihar arte.
Ainhoa Tirapu sindikatuko kideak azaldu du patronalak 255 milioi euro jaso dituela, baina langileek ez dutela hobekuntzarik izan lan-baldintzetan. Are gehiago, Tirapuk salatu du gutunak bidali dizkiela erabiltzaileei, 2023. urtearen hasieran kuota igoko dela esanez, eta igoera horren argudioetako bat izan dela negoziazio kolektiboa eta soldaten igoera: “Hori ez da errealitatea; patronala ez da eseri ere egin negoziatzera”.

Agurne Gaubeka, Behatokia: "Herritarren eskubideak gutxiago edo gehiago bermatzen dira bizi diren eremuaren arabera”

Agurne Gaubeka Behatokiko zuzendariarekin hitz egin dugu Nafarroako Parlamentuak Mañeru eremu mistora pasatzeko eskaera ukatu ondoren. Gaubekaren esanetan, Nafarroako herritarrek “zatituta” jarraitzen dute, eta herritarren eskubideak “gutxiago edo gehiago bermatzen dira bizi diren eremuaren arabera”. Era berean, gehitu du euskararen aldeko pausoak ematen diren bakoitzean, “oztopoak” azaleratzen direla.
Egoera larritzat jo du Gaubekak: “Benetan larria da egoera norbaiti iruditzen bazaio eremu mistora pasatzeak bakarrik gaztelaniaz bizi direnen eskubideak murriztuko dituela, eta larria da Gobernuko alderdi batzuen jarrera”. Horren aurrean, herritarrek presioa egiten jarraitzea ezinbestekotzat jo du, eta baita Nafarroa osoan zonifikazioaren legea bertan behera uztea ere.

Otsailaren 8an 'Hondamendia' antzezlana eskainiko da Gasteizen

Harkaitz Kanoren gidoiarekin Ximun Fuchs-ek zuzendutako antzezlana da 'Hondamendia'. Istorioa 2020ko otsailaren 6an hasten da eta 2022ko inauterietarainoko ibilbidea egiten du. Axut! eta artedrama antzerki konpainien arteko elkarlana da, batera egiten duten 5. proiektua. Musika zuzenean, dantza eta antzerkia biltzen dituen lana da. Zaldibarreko hondamendia hizpide izanik, hondamendia gertutik pairatu zutenekin bildu dira prozesuan. Bestalde, Osasun zerbitzuko gatazkak, lan heriotzak eta lan baldintzak jomugan jartzen ditu antzezlanak.

Etxegabe bati erredurak egiteagatik eta haren txabolari su emateagatik pertsona bat atxilotu dute

Hilketa saiakera egotzita atxilotu dute ustezko erasotzailea. Erasoa igande gauean gertatu zen, Bilboko Uribarri auzotik gertu. Erasotzaileak txabola gasolinaz busti zuen, su emateko asmoz edo. Txabola horretan bizi zen etxegabea lo zegoen momentu horretan, baina zaratak esnatu zuen, eta garaiz irtetea lortu zuen. Dei baten bidez, gertatutakoaren berri jaso zuten Ertzaintzak eta Udaltzaingoak. Larrialdi zerbitzuek ospitalera eraman eta bertan artatu zuten, biktimak beso batean bigarren graduko erredurak zituen. Ustezko erasotzailea atxilotu zuten. Astelehenean, epailearen aurrera eraman zuten, hilketa saiakera egotzita.

hamaika telebista

11 laguntzaile

Image