Saioak

All Stories

Sindikatuek informazio gehiago eskatu diote Arcelor Mittali erregulazioaren arrazoiei buruz

Arcelor Mittalek aurkeztutako aldi baterako erregulazio espedientearen negoziazioek jarraitzen dute, gaur goizean bildu dira hirugarrez sindikatuak eta zuzendaritza. Arcelor Mittaleko zuzendaritzak aldi baterako enplegu erregulazio espedientea proposatu du Espainiako Estatu osoan. Espedientea ezbaidatzeko, negoziazio-batzordea eratu du enpresak, eta, bertan, ELA, LAB, UGT eta Comisiones Obreras sindikatuek parte hartzen dute. Asteazken eta ostegun bitartean batzarrak izan dituzte sindikatuek zuzendaritzarekin. Bada, aldi baterako enplegu erregulazioren arrazoiei buruz jasotako informazio eskasa dela salatu dute ELAk eta LABek.

David Cronenberg zuzendari kanadarrak jaso du Donostia Saria

David Cronenberg zinemagile kanadarrak Donostia Zinemaldiaren 70. edizioko bigarren Donostia Saria jaso du. Filmak egiten jarraituko duela agindu du, eta zinemaren krimena "inoiz baino beharrezkoagoa" dela.

David Cronenbergek (Toronto, Kanada, 1943) gaixotasuna, indarkeria, sexua, gorputza, esperimentazio zientifikoa eta halako gaien inguruan eratu du bere filmografia; izan ere, esperimentazio zientifikoak oso presentzia handia du Shivers (1975), Rabid (1977) eta The Brood (1979) filmetan.

Lasarte-Orian energia komunitate bat sortuko dute, 1.000 familia hornitzeko xedearekin

Estrategikoki kokatutako 6 instalazio izango dira, eta bertan panel fotovoltaikoak jarriko dira. Horien bidez, autokontsumorako erregimenean, udalerriko auzo eta eremu guztietara energia garbi eta berriztagarria eramatea bermatuko dela ziurtatzen da. Aurreikuspenen arabera, udalerriko 1.000 familia eta denda hornituko ditu, eta horri esker, argindarraren fakturan % 30 aurreztuko dute.

Hurrengo eguneko pilula doakoa izango da emakume guztientzat Iparraldean

Hurrengo eguneko pilula doakoa izango emakume guztientzat, eta ez dute errezetarik beharko farmazietan eskatzeko; hala gertatuko dela azaldu du, Frantziako Osasun ministroa François Braunek. "Larrialdiko kontrazepziora jotzeko dauden arazoei aurre egiteko" neurri gisa aurkeztu du, "jakin baita pilularen eraginkortasuna haurdunaldirako arriskua dakarren harremanaren osteko 24 ordutakoa dela gehienez ere.

Oraindik ez du zehaztu neurria noiz sartuko den indarrean, baina ministroak ziurtatu du 2023ko Gizarte Segurantzaren lege proiektuan sartuko dutela; irailaren 26an aurkeztuko dute lege proposamen hori Frantziako Ministroen Kontseiluan.

Egun, 18 urtetik beherako emakumeek doan eta errezetarik gabe lor dezakete hurrengo eguneko pilula; 26 urtetik beherakoek, berriz, errezeta behar dute. Gainerakoek, errezeta behar dute eta ordaindu behar dute pilula lortzeko.

Mikele Landak ‘Noizko Basoa’ filma aurkeztu du Zinemaldian

Nazioarteko 13 lanek osatu dute NEST Zinema Ikasleen Film Laburren Topaketaren 21. edizioko sorta, eta aurten, aurrenekoz, euskarazko bi film labur izan dira lehian. Mikele Landa Egiguren sortzaile bizkaitarraren Noizko basoa da horietako bat, Elias Querejeta Zinema Eskolako ikasle izan bitartean gauzatutakoa.
Mundu osoko zinema eskoletako ikasleen film laburrak saritzen ditu sariketak, zehazki, eta 160 eskolak aurkeztutako 350 filmen arteko hamahiru bereizi ditu hautaketa batzordeak aurten.
Ez-fikziozko film bat da Mikele Landaren Noizko basoa, filmaren sinopsiak iradokitzen duenez, saiakeratik gertu dabil lehiaketara aurkeztu duen lana. “Baso bat berriz hasten da. Herri batek inoiz ikusi ez zuen paisaia bat gogoratzen du. Lur lehorra astintzen duten eskuak, aitzurrak eta botak, Ullan noizbait bizi ziren zuhaitzak azalera ateratzeko. Hemen sortzen da ibaia etengabe, eta jada ahantzitako hizkuntza bat xuxurlatzen du. Baso bihurtzen denean, nor biziko da leku honetan? Baso bat landatu al daiteke? Inork ahoskatuko al du bere izena? Non hasten da herri bat?”.
Tabakalerako Medialabeko estudioan ikusgai egongo dira orain arte saritutako film laburrak.

Mercedes-Benzek Gasteizko lantegia 23 hektareatan handitzeko proposamena aurkeztu dio Udalari

Mercedes multinazionalak Gasteizen duen lantegia handitzeko eta sendotzeko proposamena aurkeztu dio asteazken honetan Gorka Urtaran alkateari. Proiektuak 23 hektarea hartuko dituen industria gune berria eraikitzea aurreikusten du. Nabarmendu duenez, egitasmoak hiriaren Eraztun Berdea eta udal araudia "errespetatuko" ditu.
Urtaranek lantegiko zuzendariari, ziurtatu dio Udala aliatu izango duela lantegia hegoalderantz handitzeko eta sendotzeko. “Ziurgabetasun-garaian, enpresa finkatzeak zuzeneko eragina du 5.000 familiatan eta udalerriko eta Euskadiko ekonomia osagarrian.”
Urtaranek proposatu du ekoizpen- eta industria-erabilerako eremu berri bat mugatzea egungo lantegiaren inguruan, hiri trinko bat eta lurraldearen oreka ekonomiko bat lortzeko helburuekin bat etorriz, Eraztun Berdearen eremuko gune naturala errespetatuz.

Burujabe eguna ospatu da larunbat honetan Tafallan

Ekonomia sozialaren arloan ibiltzen diren kooperatiba eta enpresa ezberdinek hitzordua eman dute Nafarroako erdialdea, eta bertan haien proiektuak ezagutu eta informazioa jasotzeko aukera izan dute gerturatu diren guztiek.
Ondalankoopek deituta, Goiener, Izarkom, Errigora, edo Kop 57 (berrogei eta hamazazpi) bezalako proiektuez jakiteko aukera izan zen. Sistema kapitalistaren egiturei eta multinazionalei alternatibak existitzen direla plazaratu nahi izan zuten antolatzaileek goizeko azokarekin. Energia, finantzak, komunikazioa eta elikadura eremu estrategikoak diren heinean, partaideek baliabide horien gestioa, norbere esku izatearen garrantzia azpimarratu zuten. Horretaz gain, lokalki ekoiztu eta kontsumitzearen garrantzia nabarmendu nahi izan zuten. Arratsalde eta gau partean zezen plazak kontzertuak izan ziren Asgarth eta Rotten XIII (hamairu)ren eskutik beste batzuen artean.

hamaika telebista

11 laguntzaile

Image