Irun Etorbidea zubia Gernika, Ezkaba eta Gailurrari gehituko zaie, Espainiako Gobernuak Araban, Bizkaian eta Gipuzkoan duen ordezkariak iragarri duenez. Gasteizko San Frantzisko Asiskoaren eliza, Untzaga plaza eta Eibarko udaletxea ere izendatzea aztertzen ari dira.

“Iaz, Irungo Udalak zubia memoria-leku izendatzeko eskatu zion Espainiako Gobernuari. Eta gaur iragar dezaket hala izango dela, nahiz eta iragarpen ofizialerako oraindik hilabete batzuk falta diren, administrazio-izapide guztiak amaitzeko behar den denbora. Baina erabakia Espainiako Gobernuak hartu du dagoeneko», iragarri du Marisol Garmendiak. Espainiako Gobernuaren ordezkariak, Irungo alkateak eta parte hartu duten gainerako agintariek lore eskaintza egin dute erbesteko biktimen omenezko plakan, inguruetan dagoen interpretazio zentroa bisitatu aurretik.