Skip to main content

Gurean Gaur

Rosaren itzulerak itzularazi du Pako Aristi nobelagintzara

2018-11-20

Nobelarik kaleratu gabe bi hamarkada igaro eta gero, genero horretara itzuli da Pako Aristi eta ‘Rosa itzuli da’ eleberria kaleratu du Erein argitaletxearen eskutik. Hogei urteotan, berriz, idazteko darabilen euskararen eremu soziopolitikoa ezagutzeko ahalegina egin du idazleak.

Nobela idazteko grina duela bost urte sortu zitzaion. Europako Giza Eskubideen Auzitegiak Parot doktrina baliogabetu eta euskal preso politiko dezente libre geratu zen garaian. Preso horietako batzuekin zuen harremanak eta haiekiko zegoen gizarte estigmak eragin diote Aristiri.

Euskal preso ohi horietako bat da Rosa, historia kolektiboa kontatzen duen eleberriko hiru pertsonaia nagusietako bat. Hura libre geratu zen uneak markatzen du istorioaren abiapuntua eta ETA erakundean sartzeko erabakia hartu zuen unean amaitzen da. Izatez, emakume lotsatia baina borroka armatuan murgiltzean bilakaera izan zuena. Baina eleberrian ez dira borroka armatuko gertaerak kontatzen, horiei buruzko gogoeta, baizik.

Belatz talde gernikarrak irabazi du 2018ko Banden Lehia

2018-11-17
Banden Lehiak bere 10.edizio ospatu zuen eta Gernika-Lumoko Belatz taldea atera zen garaile. Bilborock aretoan arestian irabazleak izan ziren Aneguria, Larregi, Zazkel edo Ze Esatek taldeek lehiaketa dinamizatu zuten. Lehiaketako finalera Belatz, Zizel, Dekot eta Nau taldeak heldu ziren. Belatz bostkoteak sari bikoitza jaso zuen: disko baten grabaketa eta 2019ko BBK Live festibalean kontzertua ematea.
Legebiltzarreko indar politikoekin bildu nahi dira pentsiodunak

2018-11-19
Pentsiodunen Mugimenduak aurrekontuen gaiari heldu nahi dio Legebiltzarreko talde politiko guztiekin. Gaurko agerraldian jakinarazi dutenez, alderdi guztiekin biltzeko eskaria egin diete pentsiodunen aldarrikapenak helarazteko eta alderdien iritziak biltzeko asmoz. Horrekin batera, kalean jarraitzearen beharra nabarmendu dute eta abenduaren 15ean Hego Euskal Herriko hiriburuak betetzera dei egin dute, mugimenduaren lehenengo urteurrenean.
Garai Zekenak, Hedda Gabler obraren adaptazioa, estreinatuko du Arriaga Antzokiak

2018-11-19
Garai zekenak, Arriaga antzokiaren azken ekoizpen propioak, klasiko bat dakar azaroaren 27tik urtarrilaren 24ra bitartean. Denise Despeyroux-ek Henrik Ibsenen ‘Hedda Gabler’ obra moldatu du eta Raul Cancelok zuzendua Arriaga Antzokian estreinatuko dute 19 emanaldirekin, 12 euskaraz eta 7 gazteleraz. Formatu berezian aurkeztuko dute antzezlana, eszenatokia utzi eta Arriagako txoko ezberdinak hartuko baitituzte saioek, publikoa eta aktoreak eraikinetik mugiaraziz.
EGUNEKOA: politika, gizarte eta kultura albisteen bilduma

2018-11-19
2019ko Eusko Jaurlaritzako aurrekontuen negoziazioari, urtarrilaren 12rako euskal presoen eskubideen alde Baionan eta Bilbon antolatutako mobilizazioei eta Altsasuko auziko bidegabekeria salatzeko Iruñean egindako jardunaldiei erreparatu diegu arlo politikoan. Gizarte gaietan, pentsiodunen aldarrikapenak eta Berdintasunerako Nafarroako Ezintasunen Sarearen kanpaina izan ditugu hizpide. Azkenik, kultura eremuan, Arriaga antzokiaren 'Garai zekenak' obraren berri jaso dugu.
Jaume Lopez, Kataluniako irakaspenak eta Euskal Herriko herritarren ahalduntzea

2018-11-19
Prozesu eta eztabaida konstituziogileak ardatz, Jaume Lopez irakasle kataluniarra Euskal Herrian egon da Ipes-ek, Eusko Ikaskuntzak eta Gure Esku Dagok antolatutako ekimenetan parte hartuz. Lopezek atsekabez ikusten ditu bere herriko alderdi eta erakunde independentisten taktika kontrajarriak eta babes eremua handitzearen aldekoa da. Euskal Herrian, ilusioz ikusten du Gure Esku Dagoren lana eta herri galdeketen bitartez herritarren ahalduntzea eta parte hartze demokratikoan sakontzen dela nabarmentzen du. Bere esanetan, Katalunian egindako galdeketa ez-ofizialak existitu izan ez balira, nekez iritsiko zen urriaren 1eko erreferendumera.
 
bannerra