Skip to main content

Gurean Gaur

Charenee Wade, Kenny Garret eta Chano Dominguez 42. Getxo Jazz jaialdian

2018-06-27

Uztailaren 4tik 8ra luzatuko da eta urtero bezala, mundu osoko jazz musikari onenetarikoak bilduko ditu aurtengo Getxo Jazz jaialdiak. Aurten, gainera, Hirugarren Milurtekoa atalean estiloaren aurpegi berrienei emango zaie tartea.

Vendettaren azken kontzertua, Hatortxu Rock-ekin batera

2018-06-27

Vendetta taldeak iragarri berri du bere azkeneko kontzertua abenduaren 28an eskainiko duela eta Hatortxu Rock jaialdiarekin batera izanen da. Taldeko Pello Reparazek adierazi duenez, Vendettaren kontzerturik handiena eta luzeena izanen da, guztietan bereziena izan dadin nahi dute. Horrela, asteburu berezia izanen da urte amaierakoa Atarrabian, Vendettaren kontzertuarekin, ostiralean, eta Hatortxu Rock-eko 22. edizioa, larunbatean.

 

Tubos Reunidoseko zuzendaritza kargutik kentzeko eskatu dute langileek

2018-06-27

Hainbat eskaera egin dituzte: taldeari bideragarritasuna emango dieten neurriei heltzea, besteak beste, enpresaren arazoa ez omen direlako langileen baldintzak, enpresak pilatutako zorra, baizik.

Salatu dutenez, langileei ezarri nahi dieten planak ez dakar berrikuntzarik, lan hitzarmenaren negoziazioa blokeatuta dago eta horri berrekitea nahi dute.

Akziodunek edozein neurri antisocial hartuz gero, berriz, langileek erantzun egingo dutela nabarmendu dute, eta zuzendaritza talde osoa kargutik kentzeko eskaria ere egin dute.

Emakumeen lehen San Fermin torneoa, Lesakan eta Iruñean

2018-06-27

Hasierako asmoa sanferminen barnean jaialdi gehiago jokatzea zen, baina, egutegia antolatzen hasi zirenerako, Labrit hartuta zegoen sanferminetako ia egun guztietarako. Beraz, egokia iruditu zitzaien lehen jaialdia herri batean jokatzea, horregatik izango da Lesakan, igandean, 11:30ean hasita.

Sei bikotek hartuko dute parte, bi multzotan banatuta, eta Lesakan multzo bakoitzeko ligaxka jokatuko da. Lehen bi sailkatuek finala jokatuko dute, eta bigarrenek, 3. eta 4. postuak erabakitzeko partida. Antolatzaileek gonbidapen bitartez aukeratu dituzte pilotariak, eta bost nafarrak dira. Tartean, Master Cupeko izen ezagunak daude. Besteak beste, Olatz Arrizabagala binakako txapelduna dago, Patri Espinar txapeldunordea edota Ainhoa Urien Bigarren Mailako txapelduna.

Emakume Master Cupen antolatzaileek, oraingoz, ez dute asmorik euren eskaintza Euskal Herriko beste hiriburuetara irekitzeko. Hala ere, egongo da emakumezko beste torneorik antolatuko duenik; esaterako, Donostiako Antigua auzoan. Gizonezkoen torneoarekin batera, emakumezkoen binakakoa antolatu dute uztailaren 21 eta 22rako. Pilota mistoa erabiliko dute, eta lau bikotek hartuko dute parte: Olatz Arrizabalaga Alba Martinezekin, Maite eta Olatz Ruiz de Larramendi, Miren Larrarte Miriam Arrillagarekin eta Patri Espinar Leire Garairekin.

Grande Marlaskari eragindako kaltea aitor dezala exijitu diote torturatuek

2018-06-26

Frankismo garaiko polizia lanagatik lau domina ditu Juan Antonio Gonzalez Pachecok, Billy el niño izenez ezagutzen den torturatzaileak, alegia. Domina horiek izateagatik, gainera, diru sarrera handiagoak jasotzen ditu. Ba Espainiako Barne ministro Fernando Grande Marlaskak iragarri du gobernua aztertzen ari dela domina horiek erretiratzeko bidea.

Gogora ekarri behar da, gainera, Espainia bederatzi aldiz zigortu duela Giza Eskubideen Europako Auzitegiak, eta horietatik seitan Grande Marlaskarena zela atxilotuen eskubideak bermatzeko erantzukizuna. Amaia Izkok ezikusiarena egitea leporatu dio Grande Marlaskari.

110 gaztek Euskal Herria zeharkatuko dute 31 egunetan

2018-06-26
Uztailaren 1ean hasiko da Euskarabentura izeneko ibilaldia Maulen. 110 gaztek Euskal Herria zeharkatuko dute eta uztailaren 31ean Getxora iritsiko dira, euskararen erabilera indartzea helburu duten hainbat jardueraz osatutako ibilbidea egin ostean. Ekimenaren antolatzaileek Abenduan aurkeztu zuten 16 eta 17 urteko gazteei zuzendutako proiektua. Parte hartzeko hiru gairen inguruko lanak egin behar izan dituzte gazteek, guztiak euskararekin lotuak. Proposamen guztiak jaso ostean, euskal herriko txoko ezberdinetako 72 neska eta 38 mutileko taldea osatu du antolakuntzak. Washingtondik eta Patagoniatik heldutako bi gaztek ere parte hartuko dute. 31 eguneko bidean mota desberdinetako jarduerez gozatzeko aukera izango dute partaideek: museoak bisitatuko dituzte, errealitate soziolinguistikoan adituak direnen hitzaldietara joango dira eta kirol txapelketetan lehiatuko dira, besteak beste. Ibilbide guztian ardatz izango dute Done Jakue bidea eta Euskal Herrian Munduko Ondare diren leku guztietara joango dira. Euskalabenturako antolatzaileek ekimenaren helburua euskararen erabilera sustatzea eta euskal lurraldea ezagutuz, gazte euskaldunen sare bat sortzea dela adierazi dute. Proiektua sortzeko eredu gisa, herrialde iberoamerikar desberdinak bisitatzen zituen Qetzal bidea hartu dutela ere azaldu dute. Maulen elkartu eta Done Jakue bide frantsesa hartuko dute partaideek. Uztailaren 3an Donibane Garazin izango dira eta San Fermin egunez iritsiko dira Iruñera. Uztailaren 14rako Gasteizera iritsiko dira eta Goierri zeharkatuz Tolosara iritsiko dira. Hernani eta Irun igarota, Baionara iritsiko dira kostatik, ondoren Donostiara joan eta Gernika igaroz uztailaren 30ean Bilbora iristeko. Abentura Getxon amaituko dute, Bizkaia zubian.
 
bannerra

bannerra