Urte eta erdiko lanaren ondoren, Europako Kontseiluak argitaratu du Kataluniako politikari independentisten aurka espainiar justiziari buruz egin duen txostenaren zirriborroa.

Bertan adierazten du iritzien adierazpenek ez dutela ondorio penalik ekarri behar; eta horregatik eskatu die Espainiako agintariei presoak indultatzeko edo askatzeko eta erbesteratuen kontrako euroaginduak kentzeko. Halaber, urriaren 1ean auzipetutako gainerako kargudunen aurkako akusazioak bertan behera uzteko eta elkartasun ekintza sinbolikoak zigortzeari uzteko eskatu du Kontseiluak. Ez hori bakarrik, sedizio eta matxinada delituak erreformatzea eskatzen du txostenak, "indarkeriarik gabeko ekintzengatik neurriz kanpoko zigorrak saihesteko". Amaitzeko, Kataluniako indar politiko guztiekin "elkarrizketa irekia eta eraikitzailea" hasteko eskatu dio Madrili.

Txostena, hala ere, ez da loteslea eta ekainaren 21ean eztabaidatuko da bere edukia.

Europako justiziak immunitatea itzuli die Puigdemont, Ponsati eta Comin eurodiputatuei. Behin-betiko erabakiaren zain, Europar Batasuneko estatu kideetan mugitu ahalko dira, atxilotzeko arriskurik gabe. Europako Justiziaren historian lehen aldia da Justizia Auzitegiak bertan behera uzten dituela Europako Parlamentuak bozkatutako suplikatorioen ondorioak, helegitea ebatzi aurretik.

Hiru eurodiputatuek uste dute euren argudioak "arrazoizkoak" direla ebatzi duela Auzitegiak. Puigdemontek azpimarratu du espainiar Estatuari arauak betearazteko eskaria egin behar diola Europar Batasunak, eta momentu hori "heltzen ari" dela. Eta Europako Auzitegiak ebazten duena ebazten duela, erabaki politikoa ez dela izango nabarmendu du.

Yair Lapid zentristak Netanyahuren 12 urteko agintaldiari amaiera eman diezaioke. Naftali Bennett ultranazionalistaren babesa ziurtatu du dagoeneko. Akordioaren arabera azken hau izango litzateke lurraldeko lehen ministroa legealdiaren lehenengo bi urteetan, eta ondoren Lapidek hartuko luke kargua.