Europako Batzordeak eta Europako Botika Agentziak oniritzia eman diote Moderna etxeko txertoari. Abenduan Pfizerrek garatutako txertoari baiezkoa eman ostean onartutako bigarrena da Modernarena. Gauzak horrela, Europak 2.000 milioi dosi ziurtatu ditu jada.

Covid-19aren izurriteari aurre egiteko ia 900.000 dolarreko plana adostu du AEBetako Kongresuak. Hilabeteak eman dituzte negoziatzen, baina azkenean epea amaitzear zegoela lortu dute akordioa. Gogoratu uneotan AEBetan dituztela kutsatu eta hildako gehien. Johns Hopkins Unibertsitatearen azken datuen arabera, 18 milioi kasu baino gehiago atzeman dituzte oraingoz eta ia 320.000 dira hildakoak.

Negoziatzen jarraitzea erabaki dute berriz ere, enegarren aldiz, Londresek eta Bruselak. Atzo amaitzen zen Europako Parlamentuak negoziaketak amaitzeko ezarritako epea, baina dagoeneko inork ez ditu serio hartzen muga horiek eta benetako epemuga bakarra abenduaren 31 da aspaldidanik.

Nigerian, aske geratu dira Boko Haram talde jihadistak Katsina estatuko (ipar-mendebaldea) eskola batean bahitutako 300 ikasleak. Aminu Bello Masari Katsinako gobernadoreak azpimarratu duenez, askatutakoak bihar eramango dituzte Estatuko hiriburura. Era berean, BBC telebista kate britainiarrean egindako adierazpenetan gaineratu duenez, askatutako 344 pertsonak osasunez ondo daude, eta haur bakar bat ere ez da hil bahitzaileen esku egon diren bitartean.

14.000 pertsona hil ziren atzo mundu mailan Covid-19a zutela. Pandemia hasi zenetik egun bakar batean hildako kasu kopururik altuena da. Dagoeneko milioi bat eta ia zazpiehun mila pertsona hil dira mundu osoan gaixotasuna zutela, Johns Hopkins Unibertsitateak publiko egindako datuen arabera. Balantzaren beste aldean, 41,6 milioi dira gaixotasuna gainditu eta sendatu direnak.

Kito. Desagertu da Donald Trumpek Etxe Zurian jarraitzeko izan zezakeen azken aukera. AEBetako presidentetzarako hauteskundeak Joe Biden hautagai demokratak irabazi zituela baieztatu du bertako Hautatzaileen Batzarrak.

Negoziatzen jarraitzea. Horixe besterik ez dute adostu Erresuma Batuak eta Europar Batasunak asteburu honetan. Igandean amaitzen zen Brexit osteko akordioa adosteko elkarri emandako epea, baina akordioak ezinezkoa izaten jarraitzen du oraindik ere.

Hungaria eta Poloniak euren betoak bertan behera utzi ondoren, abian da Covid-19ari aurre egiteko diru funtsa martxan jarri eta datozen 7 urteetarako aurrekontuak onartzeko prozesua. Zuzenbide estatua errespetatzeak ezinbesteko baldintza izaten jarraituko du laguntza horiek jaso ahal izateko. Aldi berean baina, ez da arrazoi horregatik diru laguntzarik blokeatuko gaiari buruz Europar Batasuneko Justizia Auzitegiak ebazpen bat eman arte.