Nazioarteko gizonezkoen futbol txapelketa nagusia azaroaren 20tik abenduaren 18ra bitartean izango da Qatarren. Milaka langile estadioak eta gainerako azpiegiturak altxatzeaz arduratu dira, denbora errekorrean, lan-baldintza oso txarretan, gehiegikeriak jasanez eta esplotazioaren biktima.

Erakunde humanitario eta sindikal ugarik salatu dituzte hamabi urte hauetan Qatarreko langileen lan-baldintzak. Euskal Herrian ere hainbat izan dira protestara atera direnak. Qatarren ez dira giza eskubideak errespetatzen, LGBTI kolektiboa jazarria da, emakumeak gutxietsiak eta prentsa-askatasuna ere gaitzesten da. Hala ere, FIFAk nahiago du ezikusiarena egin, eta ekonomiari begira jarri.