Mundua

All Stories

Krisi energetikoari aurre egiteko 140.000 milioi euro bildu nahi ditu Europako Batzordeak

Gasa erabiltzen ez duten argindar enpresen eta petrolio konpainien gehiegizko irabaziak zergapetzeko eskatu du Europako Batzordeak, eta derrigorrezkoa egin nahi du puntako orduetan argindar kontsumoa %5 txikitzea. Horrela, 140.000 milioi eurotik gora bil ditzaketela kalkulatu du.

Energia berriztagarrien, nuklearren eta lignitoen bidez elektrizitatea baliatzen duten argindar konpainiei zerga bat jartzeko asmoa du Batzordeak, aldi berean, erregai fosilak ustiatzen dituzten enpresei tasa berezi bat ezarriko die. Puntako orduetan argindar kontsumoa %5ekoa izan beharko du, horietan erabiltzen delako gehien gasa argindarra sortzeko eta, ondorioz, horiek direlako ordurik garestienak.

Irailaren 30ean dute egitekoa Energia ministroen goi bilera, erabakiak hartzen hasteko, eta horretarako negoziazioen oinarri izango da gaur eguerdian Europako Batzordeak aurkeztu duen proposamena.

Marta Rovirak adierazi du independentzia ezin dela lortu ERCren parte hartzerik gabe

ANC Biltzar Nazional Katalanaren eta Kataluniako Gobernuaren arteko tirabirak nabarmendu ziren Diadan herenegun. Tentsioaren adibide izan ziren, astelehen goizean ERCk entzun zituen txistuak. Gobernuaren dimisioa eskatzen zuten oihuak ere entzun ziren ekitaldian, eta egunean zehar egin ziren beste hainbat ekitalditan ere nabaria izan zen tentsioa.
Esquerra Republicanari “independentziaren aldeko apustua” egiteko eskatu zion Dolors Feliu ANCko presidenteak, eta hori egiten ez badu hauteskundeak antolatzeko.

Milaka pertsona elkartu dira Diada egunean, ANCk Bartzelonan deitutako manifestazioan

ANCren arabera, 700.000 pertsona bertaratu dira manifestaziora. Bartzelonako Udaltzaingoak, berriz, 150.000 manifestari izan direla esan du."Tornem-hi per vèncer. Independència" (Itzul gaitezen garaitzeko. Independentzia) izan du lelotzat aurtengo mobilizazioak.

Jovent Republica taldeak eta ERCko gazteriak bat egin dute ANCren manifestazioarekin. Era berean, bertan izan dira JxCat alderdiko zenbait kide ere; Jordi Turull idazkari nagusia, Laura Borras presidentea eta Jordi Puignero edo Jaume Giro bezalako aholkulariak, Xavier Trias Bartzelonako alkate ohiarekin batera.

Dolors Felliu ANCko presidenteak adierazi du egin dezatela independentziaren aldeko apustua, edo hauteskundeak deitzeko. Bestalde, azpimarratu du independentziarekiko zintzotasuna, gardentasuna eta erabaki irmoa eskatu dizkiela agintariei.

Euskal Herriko zenbait ordezkari politiko ere izan dira bertan,Rafael Casanovaren omenezko lore eskaintzan.

Kataluniako Egun Nazionalari hasiera emateko, Rafael Casanovaren monumentu aurreko lore eskaintzan parte hartu dute Bakartxo Ruizek eta Jon Inarrituk. EH Bilduk Kataluniako Errepublika errealitate izatea aldarrikatu du. EAJk, bere aldetik, Kataluniako gatazka konpontzeko "elkarrizketaren, negoziazioaren eta akordioaren" alde egin du.

Elisabet II.a, Erresuma Batuko erregina, Eskozian hil da, Balmoralgo jauregian, 96 urte zituela

Hala baieztatu du Erresuma Batuko Errege Etxeak ohar baten bidez. Heriotzaren baieztapena heldu baino ordu batzuk lehenago, Buckingham Palace-tik iragarri zuten medikuak "kezkatuta" zeudela erreginaren osasun egoerarekin, eta gomendatu dutela Balmoral gazteluan (Eskozia) geratzea, zaintzapean.

Elisabet II.aren lau seme-alabak Eskoziara joan dira premia handiz, tartean Charles Galeskoa hurrengo erregea izango dena. William eta Harry printzeak ere hara joan dira. Erregina, astearte honetan ekitaldi ofizial batean egon zen, Eskoziako Jauregian, Liz Trussen harreran, lehen ministro izendatzeko.

70 urte eta erdi baino gehiagoko erregealdiaren ondoren, berea izan da Erresuma Batuko agintaldirik luzeena. Charles printzeak bihar egingo du bere lehen agerraldia errege gisara, eta jarraian Eskozia, Gales eta Ipar Irlandako gobernuburuekin bilduko da aurrez aurre, Londresera itzuli aurretik.

Camilo Guevara, Che Guevararen semea, 60 urterekin hil da

Camilo Guevara March, Che Guevararen semeetako bat, astelehen honetan hil da, 60 urte zituela, infartu baten eraginez. Miguel Díaz-Canel Kubako presidenteak eman du heriotzaren berri Twitterren.

«Saminez agurtzen dugu Camilo, Cheren semea eta haren ideien bultzatzailea, aitaren ezohiko ondarearen parte bat zaintzen duen Che Zentroaren zuzendari gisa. Besarkadak Aleida amarentzat, alargun eta seme-alabentzat eta Guevara-March familia osoarentzat», idatzi du Kubako presidenteak.

Camilo Che Zentroaren zuzendaria zen, aitaren lana eta pentsamendua mantentzea helburu duen erakundea.

Mikhail Gorbatxov zendu da, Sobietar Batasuneko azken buruzagia eta Perestroikaren sustatzailea

Mikhail Sergeievitx Gorbatxov zendu da, Sobietar Batasuneko azken buruzagia eta Perestroikaren sustatzailea. 91 urterekin zendu da, gaixotasun luze baten ondorioz.

SESBen eta Gerra Hotzaren amaiera eragin zuten eraldaketen sustatzaile nagusia izan zen. 1985etik 1991ra izan zen Alderdi Komunistako idazkari nagusia, eta 1989tik aurrera SESBeko estatuburua.
Gorbatxovek 1985ean hartu zuen boterea, eta hasieratik aldarrikatu zuen sistema aldatzeko beharra. Hark bultzatutako perestroika edo berregituraketa eta glasnost edo irekiera eta gardentasun politikarekin hasi ziren aldaketa politiko eta ekonomiko nagusiak. 1987an jarri zuen martxan erreforma saila, SESB salbatuko zuelakoan. 1990ean, Bakearen Nobel Saria jaso zuen.

1991ko abuztuan CCCP SESBeko Alderdi Komunistaren sektorerik gogorrenak estatu kolpea eman zuen Gorbatxoven aldaketak geldiarazteko. Kolpeak porrot egin zuen, eta Gorbatxovek sinesgarritasuna galdu.

Urte hartako abenduaren 8an, SESBeko hiru errepublika nagusietako ordezkariek —Jeltsinek, Ukrainako presidente Leonid Kravtxuvek eta Bielorrusiako Parlamentuko presidente Stanislav Xuxkevitxek— batasunaren desegitea sinatu zuten Bielorrusiako Belavezhskaia Pustxa basoan.

1991ko abenduaren 25ean, Mikhail Gorbatxovek Sobietar Batasuneko lehen eta azken presidente kargua utzi zuen.

Moskuko Novodevichy hilerrian hobiratuko dute, Errusiako beste hainbat pertsonaia historikorekin eta Raisa bere emaztearekin batera.
hamaika telebista

11 laguntzaile

Image