Mundua

All Stories

Gutxienez 16 sexu abusu kasu salatu dituzte Kolonbiako protestetan

Kolonbiako protestetan poliziak gutxienez 16 sexu abusu kasu egin dituela salatu du Temblores gobernuz kanpoko erakundeak. Horiek dira behintzat eurek dokumentatu ahal izan dituztenak.

16 horietako bat bere buruaz beste egin duen 17 urteko neska baten kasua da. Hori baino lehen, atxilotuta zegoela poliziek sexu abusuak egin zizkiotela salatu zuen Popayanen, Kolonbia hego mendebaldean. Kasu honek areagotu egin ditu Popayanen herritarren eta poliziaren arteko istiluak. Antzeko salaketa izan dira Calin, Bogotan, Palmiran eta Acacíasen.

Independenteek eta ezkerreko alderdiek gidatuko dute aldaketa Txilen

Konstituzio berria idazteko ardura izango duen konbentzioko kideak hautatu dituzte asteburuan. Bozen %96 zenbatuta, alderdirik gabe aurkeztu diren hautagai independenteak izango dira Konbentzioko 155 kideetatik 48. Ezkerreko oposizioa ordezkatzen zuten bi zerrenda nagusiek 52 ordezkari lortu dituzte. 27 Apruebo Dignidad izenekoak eta 25 Lista del Apruebok. Eskuina zerrenda bateratu bakarrarekin aurkeztu da, eta 38 ordezkari bakarrik eskuratu ditu.

Palestinarren aurkako erasoekin jarraituko duela dio Israelek

Gazan hildakoak pilatzen jarraitzen du Israelek. Gaur goizean dagoeneko gutxienez 67 ziren estatu sionistaren bonbardaketetan hildako palestinarrak. Gau eta egun, ia etengabeak izaten ari dira ordea Israelgo hegazkinen erasoak, eta oso litekeena da dagoeneko biktima palestinar gehiago izatea. Zaurituak 300dik gora dira. Aldi berean, Gazatik bidalitako suzirien eraginez gutxienez 7 pertsona hil dira Israelen, horietako bat haurra.

Egoera are gehiago okertu daiteke gainera datozen orduetan. Bertako prentsaren arabera litekeena da gaur arratsaldean bertan armada israeldarrak Gazaren aurkako lur bidezko operazio militarrari argi berdea ematea.

Astra Zenecaren aurkako bigarren salaketa jarri du Europar Batasunak

Oraingoan kalte ordainak eskatzen dizkio Bruselak farmazia enpresari, bi aldeek 2021eko Ekainerako adostutako 300 milioi dosiak ez entregatzeagatik. Oraingoz Bruselak eskatzen duen kalte ordaina euro batekoa da. Zenbateko sinbolikoa da. Prozesuak aurrera egin ahala zehaztuko dute Europar batasunaren abokatuek zenbatekoa den zehazki Bruselak eskatzen duen kopurua.

Astra Zenecaren abokatuek aldiz diote kontratuak dioena dela enpresak ahal duen guztia egingo duela dosi kopuru hori Europar Batasunari helarazteko, eta beraz kopuru horiek ez direla lotesleak.

Ehunka palestinar zauritu ditu polizia israeldarrak Jerusalemen

Goizeko lehen ordutik istiluak izaten ari dira gaur ere Jerusalemen. Ehunka palestinar zauritu ditu polizia israeldarrak Meskiten zabalgunean izandako istiluetan. Azken egunetan istiluak izan dira Jerusalem Ekialdeen indar okupatzaileen eta palestinarren artean. Gaur Armada israeldarrak Jerusalem okupatu zueneko urteurrena da gainera, eta hori ospatzeko martxan antolatu dituzte sionistek.

Bakarkako gobernua osatu nahi du Pere Aragonèsek hauteskundeak ekiditeko

JuntsxCat alderdiko diputatuen babesa espero du Aragonesek inbestidura desblokeatzeko eta bakarkako gobernu bati ekiteko, nahiz eta geroago beste alderdiek Gobernura batzeko aukera izango luketen. Aragonesek adierazi duenez, lehentasuna hauteskundeak ez errepikatzea da. JxCatek, ordea, ez ditu amaitutzat eman koalizio gobernua osatzeko negoziazioak. En Comú Podemek, bere aldetik, aukera ikusi du gobernu progresista eratzeko, eta eskua luzatu dio ERCri.

hamaika telebista

Image