Turkia eta Siria astindu dituzten lurrikarek gutxienez 4.300 hildako utzi dituzte, herrialde horietako agintariek zabaldutako azken datuen arabera. Ankarak laguntza eskaera egin dio nazioarteari, eta goizean goizetik hasi dira hainbat herrialde laguntza eskaintzen. EB Europako Batasunak, zehazki, Frantzia, Grezia, Kroazia, Bulgaria, Txekia, Herbehereak, Polonia eta Errumaniako erreskate taldeak mobilizatu ditu.
Euskal Herritik ere joango dira laguntzera. Espainiako beste suhiltzaile boluntario batzuekin batera, Gasteizko bost suhiltzaile joango dira lanera, Accion Norte GKEarekin. Gainera, Europar Batasunaren Copernicus satelite sistema ere aktibatu dute, mapen bitartez egoeraren premiazko azterketa egiteko.
Europako Batasuneko Justizia Auzitegiak ebatzi duenez, batasuneko estatu kide batek ezin dio uko egin beste kide baten euroagindu bati, frogatu ezean azken horrek sistematikoki urratzen dituela eskubideak.
Alemaniak Leopard 2 tankeak Ukrainara bidaliko dituela iragarri du eta AEBek Abrams tankeak. Errusiak AEBetan duen enbaxadore Anatoli Antonovek adierazi du AEBen "probokazio nabarmena" dela. Mendebaldearen plana porrotera bideratuta dagoela ziurtatu du Errusiak. Espainiak ere bat egingo du Ukrainara borroka-orgak bidaltzeko Europako planarekin.
EH Bildu eta ERC Ukrainara tankeak bidaltzearen aurka agertu dira, gatazka konpontzeko bide diplomatikoak eta elkarrizketa erabili behar direla uste dute. Elkarrekin Podemosek esan du "gerrako eskaladan soilik lagunduko lukeela. Bestalde, EAJ "guztiz bat dator" tankeak bidaltzearekin.
Pedro Sanchez eta Emmanuel Macron Bartzelonan batzartu dira, bi herrialdeen arteko Adiskidetasun Tratatua sinatzeko. Batzar horren aurkako protestan ari dira goizetik milaka independentista, “Hemen ez da ezer amaitu!” lelopean.
Independentismoaren “oinarrizko eskubideen urraketa sistematikoan” bi estatu horiek duten jarrera salatzen dute. Mobilizazioan izan dira, besteak beste, Junts Per Catalunyako buru Laura Borras eta ERC Esquerra Republicanako presidente Oriol Junqueras. Junqueras, bilerara joan da, eta protestan txistu egin diote.
