Austria eta Dinamarkak iragarri dute Israelekin elkarlanean jardungo dutela hemendik aurrera Covid-19aren aurkako txertoarekin zerikusia duten gaietan. Sebastian Kurz Austriako Kantzilerrak eman du albistearen berri. Ostiral honetan bilduko da Kurz Benjamin Netanyahu lehen ministro israeldarrarekin.

Austria eta Danimarka ez dira Brusela txertoaren banaketan egiten ari den kudeaketa kritikatu eta Batasunetik at txertoak euren kontura lortu nahian dabiltzan lehenengo estatuak. Atzo bertan Poloniak Txinari eskatu zizkion txertoak eta Eslobakiak Sputnik V txertoaren 2 milioi dosi erosi zizkion Errusiari. Horri igande honetan Hungariara iritsitako Sinopharm etxe txinatarraren txertoaren dosiak gehitu behar zaizkio.

Hauteskundeak berak irabazi zituela, eta ez duela 2024an berriz hautagai izatea baztertzen. Horixe adierazi du Donald Trump AEBetako presidente ohiak asteburuan egindako kontserbadoreen konbentzioan. Joe Bidenen gobernuaren aurka ere hitz egin du esanaz inoiz presidente batek izan duen lehenengo hilabeterik okerrena dela Bidenena.

Puigdemont, Comín eta Ponsatí eurodiputatuei immunitatea kentzeko eskatu du Europako Parlamentuko Gai Juridikoetarako Batzordeak. Martxoaren 8ra arte luzatuko den prozesu baten lehen urratsa besterik ez da lehenenengo erabaki hau.

Katalunian, negoziaketei ekin aurreko adierazpenetan murgilduta jarraitzen dute Gobernu gehiengoa osatzen saiatu beharko duten alderdi independentistek. Ofizialki behintzat oraindik ez dira bildu ERC eta CUPeko ordezkariak, nahiz eta bilera hori den negoziaketei ekiteko bilera errondan Pere Aragonesen alderdiak egin asmo duen lehenengoa.

Ponent-eko espetxera eraman dute gaur goizean Eskuadra Mossoek Pablo Hasel rap abeslaria, Lleidako unibertsitatean bera babesteko eratutako “herri harresi” moduko bat desegin eta atxilotuta eraman ondoren.

Gehiengo osoa eskuratu dute Katalunian independentziaren aldeko hautagaitzek. Gainera, lehen aldiz botoen %50eko langa gainditu du independentismoak.

Lehen indarra izateko lehia oso estua izango zela zioten inkesta gehienek, eta halaxe gertatu da. PSC eta ERC33-na ordezkari lortu dituzte, ta Juntsek berriz 32. Botoetan lehen indarra izan da PSC, bozen %23 eskuratuta. ERCk %21 eskuratu du eta Junts-ek berriz %20.

Indarrez sartu da Parlamentean VOX eskuin muturreko alderdi espainiarra 11 ordezkarirekin. CUP-ek 9 diputatu eskuratu ditu, aurreko legealdian baino 5 gehiago, eta En Comu Podemek orain arte zituen 8ei eutsi die. Gaueko porrotik handiena Ciudadanosena izan da: 36 ordezkari izatetik 6 ordezkari izatera pasa baita alderdi laranja. Parlamentean ordezkaritza izango duen alderdirik txikiena PP izango da, 3 ordezkarirekin.

BBCri emisio lizentzia kendu dio Txinako Gobernuak, Londresek aldez aurretik CGTNrekin gauza bera egin ondoren.

Txinako Irrati eta Telebistaren administrazio Nazionalak, Txinan hedabideak arautzen dituen erakundeak, bertan emititzeko baldintzak urratu izana leporatzen dio irrati telebista kate publiko britainiarrari. Zehazki, erakundearen arabera BBCk ez du “egiazkoak eta bidezkoak” diren albisteak zabaltzeko eskakizuna betetzen, eta Txinaren interes nazionala eta herrialdearen batasun nazioanala ahultzen ditu. Ondorioz, Txinan gaur hasten den urte berrirako emisio eskaera ez onartzea erabaki du Txinako erakundeak.