Image

Kultura

All Stories

'Adore, Kemena, Kuraia', Zea Maysen azken lana

Azken bi urteetako abestiak bildu ditu Zea Mays taldeak 'Adore, Kemena, Kuraia' diskoan. Orain arte entzun gabeko beste lau abesti ere baditu diskoak. Diskoa joan den urtearen amaieran argitaratzekoa zen, baina ez zen posible izan.

Diskoa sarean entzun daiteke osorik, eta Durangoko Azokan aukera egongo da formatu fisikoan erosteko. Biniloan ere aterako dute. Aurkezpen bira datorren urteko otsailean hasiko dute, Miarritzeko Atabal aretoan. Besteak beste, Iruñean, Madrilen eta Bartzelonan ere egongo dira. Europan ere eskainiko dituzte kontzertuak, Zurichen, Frankfurten eta Berlinen.

Frantziako Kultura ministerioak bertsolaritza gehitu du bere kultura immaterialen katalogora

Pasa den udaberrian egin zuen eskaera Bertsularien Lagunak elkarteak, eta azken astean jaso du baiezko erantzuna: bertsolaritzak kultura-ondare immaterialaren izendapena lortu du Ipar Euskal Herrian.

Gaur egun Ipar Euskal Herrian, 120 bat saio edo ekimen antolatzen dira urtero, adin guztietako 45 bat bertsulari daude, 70 talde daude hezkuntza arautuan, bai ikastola zein eskola elebidunetan, eta 250 ikaslek izena eman dute bertsu eskoletan.

Elkarteak iaz abiatu zuen egitasmoa. Beñat Iturralde Agirre antropologoaren gidaritzapean eta Thaïs Boukellaren laguntzarekin osatu zen ikerketa lana. Arduradun zientifiko lanetan berriz, Fabien Van Geert Parisko Sorbonne Nouvelle Unibertsitateko antropologoa aritu da. Ondoan izan dituzte ere Euskal kultur erakundeko Terexa Lekunberri antropologoa eta ihauteri eta euskal tradizioetan aditua den Thierry Truffaut ere.

Koldo Otamendi, Musika Zuzenean: ‘Karakter handiko abeslaria da Gari’

Gaurko Musika Zuzenean saioak dakarrena aurreratu digu Koldo Otamendi saioko aurkezleak. Gari abeslariarekin izan da, bere ibilbide luzearen errepasotzat har daitekeen azken diskoaz luze hitz egiten. Hertzainak taldearen abeslari delako ezaguna; taldearen itzulera kontzertuetan arituko da buru-belarri eta horien ostean ekingo dio bere bakarkako diskoaren aurkezpenei.

Musika, Berdintasuna eta LGTBIQ+ topaketak Donostian izanen dira ostegun eta ostiralean

Euskal Herriko Musika Bulegoak antolatuta, Musika,Berdintasuna eta LGTBIQ+ topaketak egingo ditu azaroaren 24an eta 25ean Donostiako Tabakaleran. Horietan, besteak beste, sorkuntza egitasmoak, LGTBIQ zirkuituak, ibilbide profesionala garatzeko erronkak, musika industrian duten presentzia, zentsura, autozentsura, gune seguruak eta bestelako gaiak jorratuko dituzte.

Jorratuko diren gaiak bi ardatz nagusi dituzte: batetik, alderdi akademikoa landuko dute hainbat profesional, eta, bestetik, mahai inguruak eta solasaldiak izango dira LGTBIQ+ kolektiboko artistekin.

Ostegunean, Darryl W. Bullock ikerlari ingelesa egonen da, “David Bowie made Me Gay: 100 years of LGTB music” liburuaren egilea. Ondoren, Piro Subratek musikariak hitzaldi bat eskainiko du. Ainara Legardon, Rocio Saiz, Amaia Ispizua eta Myriam Mirandaren arteko solasaldia ere izango da.

Ostiralean, “Queer Opera: Identidades transmutables en el teatro musical” gaiaz mintzatuko da, gaztelaniaz, Mikel Chamizo. Alex Hai zinemagileak “Veni Etiam” film laburra aurkeztuko du, Mikel Zumetak “LGTBIQ+ kolektiboa Euskal Herriko musika sektorean” hitzaldia emango du, eta kontzertua izango da Eneritz Furyak, Euskoprincess, Algora eta Futurachicapop-ekin.

Irati Agirreazkuenaga: ‘Zinemaz eta beste mota bateko pelikulez gozatu ahalko dugu Bilboko Zinema Arratsaldeetan’

Kultur agenda bete dugu Irati Agirreazkuenaga kultur adituarekin: Zinema Arratsaldeak Bilboko Arkeologi Museoan; ‘Lumineszenteak: emakumeen aurkako indarkeria ikusezinak’ erakusketa Literaktum-en; Atx Teatroaren ‘Balbea’ bakarrizketa, Deustuko Udaltegian ostegunean eta Bilboko Nazioarteko Txontxongilo Jaialdia gomendatu dizkigu.

hamaika telebista

11 laguntzaile

Image