Xutik taldearen Kantu berrien azalean diskoa ezagutuko dugu gaurko Musika Zuzenean saioan, eta taldearen nondik norakoen berri izan dugu Koldo Otamendi saioko aurkezlearekin.
15 urte bete ditu Lapurdiko taldeak, eta urte hauetan guztietan iraupen luzeko lau disko kaleratu dituzte. Ska-rock doinuak landu ditu taldeak, baina Otamendik azpimarratu du hori baino “askoz ere gehiago” dela talde lapurtarra: “Ska-rock doinuak uztartu dituzte bestelako doinu eta instrumentu herrikoiekin: dultzaina, txalaparta…”
12 kantu bildu dituzte disko berrian, eta kolaborazioak ere izan dituzte: Niko Etxart, Anje Duhalde edota Odei Barroso, besteak beste. 2022ko udan kaleratu zuten diskoa, eta geroztik 20 kontzertu inguru eskaini dituzte. Zuzenekoak eskaintzen jarraituko dute datozen hilabeteetan, eta 2023ko martxoan eskainiko dute 200. kontzertua.

Bilboko Euskararen Interpretazio Zentroa berritu du Bizkaiko Foru Aldundiak, eta horri buruz hitz egin dugu Iurdana Akasuso Azkue fundazioko zuzendari eta Euskararen Etxeko kudeatzailearekin.

Akasusok nabarmendu du erakusketak baduela “oinarri zientifiko eta zurruna”, baina informazioa “era jostagarri eta gozagarrian” eskaini nahi izan dutela: “Planteatzen dugun kontakizuna optimista da, itxaropenez betetakoa, eta azpimarra jartzen du orain arte egin den lan guztian”. Horrez gain, erakusketak euskararen gaur egungo erronkak ere lantzen dituela dio.

Akasusok adierazi du “zentzumenetan” oinarrituta dagoela erakusketa, eta euskararen “bizi indarra” adierazi nahi izan dutela.

Datorren otsailaren 25ean Iruñeko Donibane auzoko bizilagun talde batek antolatu duen kontzertu berezia aurkeztu dute: Zuregatik Rock. Atarrabiako Totem aretoan eginen den kontzertua, non Zartako, Arkada eta Afu musika taldeak arituko diren. Donibane auzo bizia eta egitasmo, proiektu, protesta eta gertakari ezberdinen eszenatokia izan dela gogoratu dute. Euskal gatazkaren gordintasuna "modu oso gogorrean pairatzera eraman gaitu, auzoko belaunaldi ezberdinak markatu dituena".

Donibanen hamarnaka izan dira "kartzela, tortura edo erbestea ezagutu duten bizilagunak, ehunaka polizia ezberdinekin izandako gertakariak, isunak, kolpeak, mehatxuak edota zoritxarrez, lazgarrienak, gure bizilagunen erailketak".Eta horregatik pairaturiko gertakari ezberdinak oroitzeko eta elkarren arteko une gogor horiek konpartitzeko espazioa bat sortzea erabaki dute. "Batzuetan, elkarrekin abestu, dantzatu eta gozatu beharra dugu. Zauriak itxi bai, baina batez ere oroimena oinarri, etorkizuneko Euskal Herria marrazteko, sentitzeko, bultzatzeko". Horretara dator Zuregatik Rock, otsailaren 25ean.

Datozen aste eta hilabeteetako kultur eskaintzari begira jarri gara Irati Agirreazkuenaga kultur adituarekin. Parentesi podcast festibalaren lehen edizioa izango da martxoaren 2tik 4ra Donostiako Koldo Mitxelena Kulturunean. Lehen edizio horren leloa Muriel Rukeyzer idazlearen honako esaldi hau izango da: ‘Mundua kontakizunek eratzen dute, eta ez atomoek”. Agirreazkuenagak nabarmendu du jaialdiaren helburua dela audio plataformak balioestea, eta ertz desberdinetatik kontakizunei zabalpena ematea, “pentsamendu kritikoa sustatzeko”.

IruñaRock jaialdiaz ere hitz egin digu Agirreazkuenagak. Hamabost taldek hartuko dute parte, eta martxoaren 31n eta apirilaren 1ean izango da Iruñeko Nafarroa Arenan. Eguneko sarrerak zein abonuak salgai daude dagoeneko.
Irriziklo euskarazko umore zikloa ere izango da martxoan, eta orotara, lau emanaldi izango dira Nafarroako Antzerki Eskolan; Antton Telleriaren Nekatutak emanaldia ikusi ahal izango da, besteak beste.

Txatxoek Lanzko kaleak hartu dituzte, Miel Otxin, Ziripot, Zaldiko eta arotzekin batera. Bi urtean ez da inauteririk ospatu Lantzen, ez behintzat ohiko eran.

Hamar artista izango dira zortzigarren edizio honetan parte hartuko dutenak, zortzik musikaren atalean: Amaterra, Bamms, Ithaka, Muzak, Nakar, Olana Liss, Ramada Inn eta Siglas; eta bik arte eszenikoetan: Barrexerka eta Iago Magoa. Programa honen asmoa da balioan jartzea eta sustatzea Gipuzkoako talentuak.

Koreografiekin batera, talde askoren parodiak izan ziren. Atsedena taldeak, adibidez, Pirritx, Porrotx eta Marimototsen mozorroa aukeratu zuen, Katxiporretaren 35. urteurrena aprobetxatuz. Ttenttekek, bestalde, Tarzan pelikula aukeratu zuten, pertsonaia guztien parte-hartzearekin. Hemen eguneko irudi batzuk!