Andy Carl Conciliation Resourceseko lehendakari ohiak azaldu duenez, Aieteko konferentzia egin aurretik lan handia zegoen eginda. Iraganari eta etorkizunaren eraikuntzari buruz egindako eztabaida-prozesuei lotuta, irakaspen anitz izan direla azpimarratu du. Bere aburuz, bake prozesuetan hiru alderdi nagusi daude: Alde batetik, barne-mailakoa (ingurukoa, gatazkak konpontzea zailagoa den eremua); bestetik, helburu batzuk partekatuz, gatazkak beste pertsona edo beste talde batzuekin konpontzea; eta hirugarrenik, oposizioarena, honetan, garrantzitsua da amankumenan dauden gauzak partekatzea. Aiete mugarri bat izan zen, baina Aiete aurretik ere hainbat gauza egin ziren hiru mugarri hauetan. Hausnarketarako ere lagundu zuela esan du, eta bake prozesuetan parte hartzen dutenek neutraltasunez jokatu behar dutela.

Azken hamarkadari erreparatuz gero, eraldaketa etorri dela azaldu du, aurrerapen asko eman direla. Hamaika aukera zabalduz, Euskal Herrian talde lanean gatazka modu baketsuan ebazten jakin dela azpimarratu du.

Gobernu espainiarra Aieteko bake konferentziari garrantzia kentzen saiatu zela adierazi du Brian Currin abokatu hegoafrikarrak. Gogorarazi du Madrildik esaten zela bakea ez zela Aietetik etorri, eta gobernu espainiarra izan zela ETA garaitu zuena. Hala, adierazi du; bere ustez, Gobernu espainiarra ez zegoela prest, armagabetzerako arma horiek ez bazituzten eurek jasotzen.

Aieteko adierazpena publiko egin ondoren PPren gobernuak negoziaketak gehiegi luzatu zituela deitoratu du. Gaineratu du halako negoziaketak agerian egin behar direla, ez ezkutuan, eta ETAk erantzuna berehala eman zuela azpimarratu du. Irabazle eta galtzaileen dikotomia gainditzearen garrantzia ere nabarmendu du, bestela gatazka lehengora itzul daitekeelako.

Bere hitzartzean zorionak eman dizkio Euskal Herriari Martin Griffiths, NBEko goi kargu britainiarra. Zorionak, konponbidea bilatzeko gai izanagatik. 'Bakerako erronkak COVID-19aren osteko egoeran' izan du izenburutzat bere hitzaldiak.