Politika

All Stories

Alkateen Mugimendua omentzeko ekitaldia egin dute Bergaran

Duela 45 urte, 1976ko uztailaren 21ean, Euskal Herriaren izaeraren eta bere eskubide historikoetan oinarritzen zen burujabetzaren elkargune izan zen Bergarako herria. Foruen abolizioaren mendeurrena betetzen zela gogoratzeko, Euskal Herriko ehunka udal ordezkari elkartu ziren Bergaran, herri bat zirela eta burujabetzatik aurrera egin nahi zutela adierazteko.

Gaur, 2021eko uztailaren 21ean, Alkateen Mugimenduaren 45. urteurrena oroitu dute, eta bertan parte hartu zuten alkateak omendu dituzte. Hainbat hautetsik hartu dute parte: Lizarra eta Altsasuko alkateak Nafarroatik, Urruñakoa Ipar Euskal Herritik, Asparrenakoa Arabatik, Durango eta Arrigorriagakoek ere hartu dute parte, eta Gipuzkoako ordezkaritza osatu dute Bergara, Arrasate, Zarautz eta Donostiako alkateek, besteak beste.

Hona hemen ekimenari buruz Gorka Artola Bergarako alkatearekin izandako elkarrizketa: "Udal instituzioek badakigu zer esana gure herria eraikitzeko bidean".

Espainiako Ministroen Kontseiluak gaur onartu du Memoria Demokratikorako Lege proiektua

Espainiako Ministroen Kontseiluak Memoria Demokratikorako Lege proiektua onartu du gaur; 2007ko Memoria Historikoaren lege-proiektua ordezkatuko duena. Arau berriarekin, 1936ko estatu-kolpea eta diktadura gaitzesten dira, eta frankismoaren epaiketa errepresiboak baliogabetzat jotzen dira. Horrez gain, diktaduraren ikurrak eta aipamenak kentzea bultzatuko du proiektuak; gaur gaurkoz, Espainiako Estatu osoan 6000 ikur frankista baino gehiago daude.

Garzonen hitzen ostean EBBk behitegi bat bisitatu du abeltzainei babesa emateko

Eusko Alderdi Jeltzalearen Euzkadi Buru Batzarrak astelehenero egin ohi duen bilera egin du bart Valderejoko Parke Naturalean. Bilera amaitutakoan, Euzkadi Buru Batzarreko burukideek abeltzaintzako ustiategi bat bisitatu dute EAJk sektorea erabat babesten duela ikusarazteko, duela egun batzuk Alberto Garzón Kontsumo ministroak egin zituen adierazpen polemikoen ondorioz sortu den giro aztoratuaren aurrean.

Krimen faxisten “zigorgabetasuna” salatu dute Estatu Kolpearen 85. urteurrenean

1936ko estatu kolpearen 85. urteurrenean, `Araba berria eraiki´ lelopean, elkarretaratzea egin dute Gasteizen, eta manifestua irakurri EH Bildu, Ahal Dugu-Podemos, Ezker Anitza-IU eta Equo-Berdeak alderdiek.

Ekitaldian nabarmendu dute Estatu kolpe hark milaka pertsona erail, zauritu, espetxeratu edota erbesteratzeaz gain, isunak eta konfiskazioak eragin zituela, baita gosetea, miseria eta suntsipena ere.

85 urte geroago, krimen haien "zigorgabetasunak" bere horretan jarraitzen duenez, "egia, justizia, erreparazioa eta berriz ez gertatzeko bermeak gauzatzeko ezarritako nazioarteko parametroak" betetzeko eskatu dute.

Europako Abokatuen Elkarteak 13/13 sumarioko epaiketa bertan behera uztea eskatu du

Joan den astean hasi zen Espainiako Auzitegi Nazionalean 13/13 sumarioko epaiketa, euskal presoen abokatu lanetan aritutako zortzi herritarren aurka. Horren aurrean, ELDH Europako Abokatuen Elkarteak baieztatu duenez, 13/13 sumarioaren epaiketan irregulartasun ugari daude, eta Espainiako Gobernuari prozesu hori bertan behera uzteko eskatu dio.

Etxeratek euskal presoei ezartzen zaien salbuespenarekin behin betiko amaitzea eskatu du

Euskal presoen seniden elkarteak salatu du aurten 32 euskal presori oztopoak jarri dizkietela erredentzioak, irteera baimenak eta hirugarren graduak eskuratzeko. Bide batez, Etxeratek ohartarazi du ezin dutela beste hiru hamarkada itxaron presoei dagozkien baimenak eta hirugarren gradua lortzen.

13/13 auzian CNIren parte hartzea baieztatu dute Guardia Zibilek

13/13 sumarioko epaiketak uztailaren 26an jarraituko du, atzokoa hirugarren saioan izan zen eta bi Guardia Zibilek deklaratu zuten, lekuko gisa. Poliziek baieztatu zuten CNIk parte hartu zuela ikerketan eta 2008an atzemandako dokumentaziotik abiatu zela 2010eko polizia operazioa. Hala ere, defentsaren abokatuek auzitan jarri zuten Guardia Zibilen lekukotasuna.
hamaika telebista

Image