Arrazakeriaren eta Xenofobiaren aurkako Nazioarteko Eguna da gaur. Testuinguru honetan, asteburuan urteroko martxa egin dute Pasaiatik Donostiara, mugak libre igarotzea eragozten duten "politika arrazistak" salatuz. Bien bitartean, Ertzaintzak jakinarazi du gorroto-delituengatik jarritako salaketek gora egiten jarraitzen dutela, batez ere arrazakeriak eta xenofobiak eragindakoek. 2021ean zenbatu dituzten 277 gorroto-delituetatik 162 arrazakeriak eta xenofobiak eragindakoak izan dira. Bestalde, Foru Erkidegoko arrazakeriaren kontrako 2021eko txostena aurkeztu du Nafarroako Sos Arrazakeriak eta arrazakeriaren aurkako manifestazioa deitu du datorren larunbaterako.

Frantziako Hego Mendebaldeko Egitasmo Handiaren diruztatze plana onartuta, AHT berria Euskal Herrira iristea jarri dute helburu. Bi asmo zehaztu dituzte: epe ertainean Bordele-Tolosa-Akize ardatzean abiadura handiko sareko gaitasunak hobetzea, eta epe luzera, trenbide berria mendebaldeko kostatik Akizera eta Espainara eramatea. Horretarako Euskal Herria baliatuko dute.

Aldarrikapen ugari izaten ari dira adinekoen egoitzei begira. Batetik, Arabako egoitzetako langileek grebara joko dute hilabete amaieran negoziazioen "blokeoarekin" amaitzeko eta langileen lan baldintza duinak aldarrikatzeko.
Bestetik, Babestu elkartearen arabera, egoitzetako erabiltzaile gehienak ez ditu Osakidetzak artatzen, eta hain zuzen ere, pribatizazio hori salatu nahi dute larunbatean egingo duten elkarretaratzean.

Gasteizek unibertsitate pribatu berri bat izateko atarian dago. Hain zuzen ere, Baskonia-Alaves taldeak bultzatu duen proiektua da, eta osasun, kirol eta teknologia berrien hezkuntza eskaintza izango dituzten lau gradu eskainiko ditu, 180 ikasleei zuzenduta.

Bidasoa ibaian desagertutako migratzailearen bilaketa lanak bertan behera uztea erabaki du Segurtasun Sailak. Dena den, Ertzaintzaren ikerketak irekita jarraitzen du. Testuinguru honetan, Xabier Legarreta Jaurlaritzako Migrazio eta Asilo zuzendariak azpimarratu du "harrera sistema antolatzea dela orain lehentasuna, inor kalean gera ez dadin".

2020ko martxoaren 29an, polizia agenteek magrebtar emakume bat eta haren seme Salman jo zituzten Bilboko San Frantzisko kalean. Telefono batekin egindako grabazio bati esker, hedapen handia izan zuen komunikabideetan, eta erantzun handia jaso zuen. Poliziaren arrazakeria, migratzaileen kriminalizazio sistematikoa eta poliziaren zigorgabetasuna salatu dituzte, basakeria eta diskriminazio ekintzen aurrean.

Kilometroak jaiaren baitan ospatuko den 'Infinitu Irribarra' ekimena aurkeztu dute Donostian. Euskal Herria eta euskararen alde irribarre egin eta horiekin munduko mapa osatzea da erronka, nork bere buruari argazkia aterata eta sarera igota.