Euskaraz idatzitako orain arteko testu zaharrena aurkitu dute Aranzadi zientzia elkarteko ikerlariek Nafarroan. Eskuin esku baten forma du, brontzezkoa da, eta lau lerroko inskripzio bat dauka. Lehen hitzak zuzenean lotzen du gaurko euskararekin, 'sorioneku', baina, ondorengo guztiek ez dute inolako antzik gaur egungo euskararekin. Aurkikuntzak frogatu du inguru horretako herritarrek baskonikoz hitz egiten zutela garai hartan, eta hizkuntza horretan alfabetatuta zeudela.

Pieza hau Irulegiko baskoi herrixkako etxe baten hondakinen artean aurkitu zen, Sertorioren gerran Kristoren aurreko 82 eta 72 urteen artean erre zena. Testurik luzeena da orain arte hizkuntza baskonikoan agertu direnen artean. Pieza antza etxekoei edo bisitariei zoriona opatzeko eta zoritxarra uxatzeko objektu bat da, objetu apotropaiko bat.

Gotzone Sagardui Eusko Jaurlaritzako Osasun sailburuak iragarri du Araba, Bizkai eta Gipuzkoako ospitaleetako amatasun unitateetan sartzeko segurtasun protokoloak indartuko dituela.

Pazientearen segurtasuneko adituen taldeak egindako gomendioei jarraikiz hartuko ditu neurriak: identifikazio txartel elektroniko bidezko sistema bat ezarriko da, zeina beharrezkoa izango den amatasun unitateetan sartzeko, langileentzat zein senideentzat.

Horrez gain, ospitaleetako sarbideetan hobekuntzak egingo dira, eta eraikinen kanpoaldean kameren bidezko zaintza sistemak indartuko dituzte. Ez nazazue bakarrik utzi izeneko protokoloa idatziz emango zaie beti gurasoei, eta kanpainaren infografiak eta kartelak paratuko dira logeletan.

Azterketak euskaraz egiteko eskubidea aldarrikatu dute Bordelen. Seaskako mila ikasle inguruk egin dute protesta, baxoko azterketetan izena emateko azken egunean. Izan ere, Frantziako Gobernuak ez dio erantzun oraindik Seaskari. Peio Jorajuria Seaskako lehendakariak azaldu digu egoera.

Azkenaldian oihartzun handia izaten ari dira Itsaraz eta Piaspe proiektu eolikoak. Statkraft enpresak aurretiazko baimen administratiboa jada eskatu dio Eusko Jaurlaritzari. Hurrengo pausoa Ingurumen Sailari dagokio, hori onartzea edo baztertzea. Urriaren 11n Azpeitian aurkeztu zuen enpresa norbegiarrak Piaspe parke eolikoa. Asteazken honetan, berriz, Aramaion aurkeztuko du Itsaraz proiektua.

XXI. mendean aurrera egin ahala, klima aldaketaren ondorioek eragina izango dute itsasoaren batez besteko mailaren igoeran, eta horrek kalteak sortuko ditu inguruko herritarrengan. Ildo horretan, Gipuzkoako Foru Aldundiak Pasaiako Udalaren eskutik klima larrialdiak bertan eragindako kalteberatasunari buruzko azterketaren berri eman du. Ebaluazio txosten horrek Pasaiako Badian izan daitezkeen arrisku proiekzioak eta balizko eraginak biltzen ditu.

50. urteurrena ospatu du Elhuyar fundazioak, Donostiako Kursaalean. Elhuyar 1972an jaio zen, zientzia euskaraz lantzeko helburuarekin. Ordutik, etengabe aritu da lanean Elhuyar, zientzia ez ezik, hizkuntza-zerbitzuak, adimen artifiziala, hizkuntza-teknologiak eta gizarte-aholkularitzako zerbitzuak eskainiz, eta euskara garatuz, honako helburu honekin: euskaratik, teknologiaz eta ezagutzaz baliatuz eta zientzia zabalduz, gizarte aktibo, kritiko eta berdinzalea eraikitzea.

Hizkuntza baskonikoko idazkunik zaharrena aurkitu berri da Arangureneko haranean. Brontzezko eskuak 2.000 urte baino gehiago ditu. Orain arte iberiar peninsulan ezagutzen den dokumenturik zaharrena da bai, baina baita luzeena ere, euskaraz idatzia. Beste aurkikuntza batzuekin batera, eskualde horretako antzinako biztanleek idazkera erabili zutela baieztatzen du. Aurkikuntza Irulegiko herrian egiten ari diren indusketen esparruan aurkitu du Aranzadi Zientzia Elkarteak.