Frantziako Macronen Gobernuak iragan hilean adierazi zuen AHTaren Bordele eta Akize arteko trenbidea ez dutela 2042a baino lehen amaituko. Horrek euskal Yarekin egingo duten lotura ere zeharo atzeratzen du. Asmo horien ostean, Kantabriako, Asturiasko eta Galiziako presidenteekin batzarra egin du Iñigo Urkullu lehendakariak Ajuriaenean. Helburua da Emmanuel Macronen Gobernuari presio egitea lotura hori azkar dezan.

2023rako Udalekuak programak ia 4 mila plaza eskainiko ditu. Izenak emateko epea Gipuzkoan, martxoaren 20tik 28ra izango da, Bizkaian 20tik 29ra eta Araban, berriz, 22tik 31ra. Udalekuak 3 lurraldeetan eta Nafarroan kokatutako 15 instalazioetan garatuko dira.

“Burgesiaren aparatu politikoak suntsitzera” eta “herri langileen borroka” aldarrikatzera deitu dute. NATO eta EBren aurkako herri plataformak, BardenasYa kolektiboak eta Askapenak antolatuta izan da protesta Bilbon.

Identifikaturiko 17 errepublikazaleen izenak duen plaka bat jarri dute "Duintasuna" eskulturaren erreplika baten ondoan.

Donostiako Marrutxipiko lotune berriaren eraikuntza aurrera doa. Donostia ekialdeko sarrera-irteeren trafikoa deskargatzeko balioko du. Dagoeneko amaitu da Marrutxipi saihesbidearekin lotzeko obren lehen fasea: kolektore berriak jarri dituzte, eta saneamendu orokorreko lanak egin dituzte. Bigarren zatiari ekingo dio orain jarduketak. Ondorioz, trafiko guztia Irungo noranzkotik desbideratu beharko da datorren udan. Obra honen bidez, sarbideak hobetu, trafikoa arindu eta ibilgailu kopurua murriztuko da. 2024ko bigarren seihilekorako sarbidea erabilgarri egotea espero da.

Egun 162 hotel eta 1280 pisu turistiko daude Donostian, 2022 amaierako datuen arabera. Azken bost urteetan laurden bat egin du gora hotel kopuruak, eta gehiago etortzekoak dira, zenbaketa horretan ez baitira sartzen orain eraikitzen ari diren eta baimena duten beste zazpi hotel. Donostiako saturazioa medio eta erdiguneko herritarren kexari erantzunez, Udalak urtebetez hotelak eta apartamentu turistikoak eraikitzeko baimen gehiago ez ematea erabaki du.  

Hilaren amaieran jarriko dute neurria indarrean, behin udalbatzak onartuta. Eneko Goia Donostiako alkateak esan duenez, hartutako erabakiaren helburua ‘jarduera turistikoa arautzea eta hirian hotel berriak irekitzeari mugak ezartzea’ da.

Sei hamarkadaren ostean, trafiko eskumena berreskuratzeko lehen urratsak emango ditu Nafarroak. Foruzaingoa izango da Nafarroako errepideetan gertatzen denaz arduratuko den zerbitzu bakarra, eta, beraz, haiek jarri eta kobratuko dituzte trafikoko isunak. Ardura horiek, baina, gradualki hartuko ditu.

Hizkuntza politika eraginkor bat eta baliabide duinak aldarrikatuko dituzte. Frantziako Estatuak ematen dituen trabez gain, tokiko erakundeak ez direla erantzuten ari azpimarratu dute. Hala, eragile guziek bizi duten prekarietatea salatu dute.