Arabako, Bizkaiko eta Gipuzkoako hiriburuetan protestak egin dituzte igande honetan pandemiaren beharrizanen araberako aurrekontuak eskatzeko. Euskal Herriko Eskubide Sozialen Kartak egindako deialdiari erantzunez, Jaurlaritzari aurrekontu sozial, parte hartzaile eta burujabeak eskatu dizkiote gerturatutakoek.

Araban, parke eoliko berriak tramitatzen hasteko lau eskaera aurkeztu ditu Aixeindarrek hainbat instantzia administratibotan. Aixeindar, Euskal Autonomia Erkidegoan proiektu berriztagarriak bultzatzeko iaz sortutako elkartea da.

Ekonomia Bultzatzeko Zinegotzigoak eta Biodonostiak hitzarmen bat izenpetu dute. Donostia Sustapenaren bitartez, biozientzia eta osasun arloan inguruko berrikuntza eta ekintzailetza proeiktu berriak sustatzea du helburu. Horretarako, osasun arloarekin zerikusia duten enpresa proeiktuak lagunduko dira.

Osakidetzako lan eskaintza publikoen auzian inputatu gehiago eskatu ditu LAB sindikatuak. Horrez gain, lan gatazken errepasoari so, lan istripuei helduta, Petronorren lanera zihoan behargin bat hil zen astelehen goizean, findegira sartzera zihoala, Muskizen. Ostera, Toledoko Itunaren aurka asteburuan eginiko protestetan 9.000 pertsona inguru batu dira.

Alami eta Bahia beren etxetik kaleratzeko agindua emana zuen Blackstone putre-funtsaren eskariaz epaitegi batek. Etxegabetze horren aginduaren berri eman zion familiak bi hilabete direla Bilboko Maizterren Sindikatuari. Orduan, sindikatuak kasua ikertzeari ekin zion eta Blackstonekin negoziazio prozesu bat zabaldu zedin lanean jarri ziren. Interpelazio dinamika eta gero, putre-funtsaren filial bat beraiekin harremanetan jarri zen bilerei ekiteko. Elkarrizketen ostean, maizterren sindikatuak etxe-kaleratzea atzeratzea lortu du. Horren kontaketari heldu dio Iñigo Santxo kideak.

Hezkuntza komunitateko zenbait kidek Hego Euskal Herriko hainbat auzo eta herri aldarriz josi zituzten asteartean, Hezkuntza Plazara egitasmoa oinarri hartuta. Lan gatazkei helduta, bestaldetik, Bilboko portuko zamaketariek Lan Ministerioaren ibilbide-orria onartu dute. Gainera, hegazkingintzaren sektorea krisiaren jo mugan dago eta hainbat izan dira azken egunetako protestak.

Langabeziak nabarmen egin du behera azaroan Hego Euskal Herrian. Aisialdia eta bizitza soziala murrizteko neurriek izan dute eragina lan merkatuan. Ohikoa da azaroan langabeziak behera egitea, osotara, 171.963 lagun ageri dira langabe gisa erregistratuta Lanbideren eta Nafar Lansareren bulegoetan, urrian baino 5.416 gutxiago.