Bizkaiko autoeskoletako langileek greba eguna izan dute, ELA eta CCOO sindikatuek deituta. Sindikatuek salatu dute 11 urte daramatzatela lan-hitzarmena berritu barik, baina horrez gain, sektoreko lan-baldintzak erregularitzatzeko eta genero-arrakalarekin amaitzeko eskatu dute. Gauzak horrela, patronalaren blokeoaren aurrean mobilizazioekin jarraituko dutela berretsi dute.

Volkswagenek Nafarroan duen lantegia ekainaren 10ean, 11n, 17an eta 18an itxiko dute. Zuzendaritzak sindikatuei asteazken honetan jakinarazi dienez, txipen hornikuntza krisi globalaren ondorio da. Enpresak eta langileek "egoera kezkatzekoa” dela adierazi dute `polo berriaren salmenta hastekoa delako.

“SOS Aiaraldea” lelopean lau orduko lanuzteak egin dituzte eta manifestazioak antolatu dituzte, Laudion eta Amurrion. Gainera, hainbat eragile sozial eta sindikal batu dira eskualdean lanuzteak egiteko deiari. Milaka herritarrek eta dozenaka aldarriek kaleak hartu dituzte goizean Laudion egin den protestan, eskualdeko hainbat enpresetako langileek, gizarte eragileek, gazteek eta ostalariek, besteak beste, bat egin baitute mobilizazioarekin. Arratsaldean, beste manifestazio bat egingo dute Amurrion.

Laudioko eta Amurrioko lantegietan ordezkaritza duten bost sindikatuek - ELA, LAB, CCOO, ATAL eta STAT - aho batez gaitzetsi dute enpresako zuzendaritzak egindako proposamenak. Izan ere, enpresak greba uztearen truke, bi urtez langile gehiago ez kaleratzea eta inbertsioak eskaini zituen. Baina, beharginek ez dute proposamena onartu eta proposamena baztertzeko arrazoi nagusia eman dute: zuzendaritzak ez duela atzera egin 129 langileen kaleratzean. Horregatik, beharginek greba mugagabean jarraituko dutela iragarri dute eta hurrengo manifestazioak ekainaren 2an egingo dituzte Laudion eta Amurrion.