Gaur dute Bizkaiko metalgintzako langileek asteko azken greba eguna. Sindikatuek, momentuz, balorazioa positiboa egiten dute, nahiz eta tentsio une batzuk egon badira ere. Gaur gaurkoz, ez dute patronalarekin beste bilerarik hitzartu, hala ere, beste behin azpimarratzen dute, negoziaziorako prest daudela baldin eta baldintzak eskatutakoak badira.

Arabako Mercedesek ekoizpenaren zati bat geldituko du ostiral eta larunbat honetan, Bizkaiko metalgintzako grebak sortzen ari den hornidura arazoengatik. Ostiralean, abenduak 2, muntaketa gordineko langileen hiru txandak bertan behera geratuko dira, eta arratsaldeko eta gaueko txandak Azken Muntaketaren eta Pinturaren sektoreetan.

Larunbatean, berriz, hiru sektore horietan eguneko hiru txandak geratuko dira bertan behera. Enpresak gaineratu du, prototipoetan jarduten duten langileei lanuzteek ez dietela eragingo.

Araudi berriak Euskal Autonomia Erkidegoko sektore publikoan diharduten 100.000 beharginen jarduna antolatu eta arautzen du. Araudia onartu da Jaurlaritza osatzen duten bi alderdien (EAJ eta PSE-EE) aldeko botoekin eta PP+Cs koalizioaren abstentzioarekin. EH Bilduk eta Elkarrekin Podemos-IUk kontra bozkatu dute, eta gogoratu dute sindikatuen babesik ere ez duela.

EH Bildu eta Podemos-IU alderdien ustez, legeak ez du administrazio publikoaren euskalduntzean pausorik ematen, eta ez du konpontzen EB kanpoko herritarrek langile publiko izateko duten arazoa.

Legeak ez du sektore publikoan ordezkaritza duten sindikatuen babesa jaso. LABek, esaterako, elkarretaratzea egin du goizean Legebiltzarraren kanpoaldean, "Lege Publikoaren Lege hau ez da langileona" lelopean.