Horietako bat egoera larrian dago. Tubos Reunidos enpresak Amurrion duen fabrikan astelehenean 53 eta 58 urteko bi langile zauritu ziren. Goi-tentsioko aparatuak zeuden eremu batean mantentze lanak egiten ari ziren. Ondorioz, langile bat oso larri zauritu zen, eta haren ondoan zegoen beste behargin batek zauri arinagoak jasan zituen.

Enpresa transnazionalen eta giza eskubideen euskal zentro bat sortzea aldarrikatzen du Euskal Herriak Kapitalari Planto! plataformak. Eta zentro publikoa sortzeko ez-legezko proposamena eztabaidatuko da ostegun honetan Eusko Legebiltzarrean. Egitasmoak Kapitalari plantoren proposamena du oinarri, baina EH Bilduk eta Elkarrekin Podemosek aurkezten dute modu bateratuan. Zentroak ezaugarri hauek landuko lituzke bereziki: izaera publiko eta juridikoa izatea, enpresen erregulazioa, kontrol publikoa eta demokratikoa eta erakunde publikoen eta gizartearen arteko lankidetza bermatzea.

Soldata Berdintasunaren Aldeko Nazioarteko Egunean, soldata arrakala salatzeko eta sexuen arteko soldata berdintasuna aldarrikatzeko protestak egin ditu LABek Bilbon eta Iruñean. Mobilizazioetan sindikatuak aldarrikatu du itunak berritzeko negoziazio kolektiboetan kontuan har dadila emakumeen diskriminazioa, baita sexuaren araberako lan banaketarekin amaitzeko neurriak ere. Era berean, sektoreetako soldatak parekatzeko konpromisoak hartzeko eskatu die agintari politikoei.

Frantziako herritarren ia %70ak gaitzesten du Macronen Gobernuak proposatutako pentsio erreforma, 'Le Journal du Dimanche' egunkariak argitaratutako datuen arabera. Bien bitartean, Parisko Gobernuak erreformari eusten dio, eta gaur goizean, gainera, Emmanuel Macron Frantziako presidenteak ziurtatu du, pentsio sistema publikoa bermatzeko lan gehiago egin behar dela.

ELA sindikatuak salatu du erretiro pentsio berrien erosahalmena %4,5 txikiagotu dela Bizkaian, Araban eta Gipuzkoan azken 8 urteetan. Izan ere, 2022ko azaroan erretiro pentsio berriak 1.694 eurokoak izan ziren, eta 2014an, 1.610 eurokoak. Sindikatuaren arabera, gainera, erretiroa hartzeko adina ere luzatu egin da. Hala, mobilizatzeko deia egin du ostegun eta ostiralerako.

ELAren arabera, 2013an abian jarritako pentsioen erreforma dago horren guztiaren atzetik. Erreforma hura indarrean jarri zenetik pentsioen erosteko ahalmena txikiagotuz joan dela salatu du sindikatuak. ELAk ohartarazi du prestatzen ari diren erreforma berriaren helburua dela pentsioa kalkulatzeko kontuan hartzen diren urteak 25etik 30era pasatzea.