Glovok, janari eta erosketa banaketa enpresak, hainbat millioi euroko isunak pilatu ditu, oraingoan, 57 milioi euroko isuna jarri dio Espainiako Gizarte Segurantzaren Lan Ikuskaritzak, autonomo faltsuak enplegatzeagatik eta atzerritarren lan irregularragatik. Hala ere, isunek ez dute Glovoko langileen irregulartasun egoera konpondu. Izan ere, Glovok ez dio legeari men egiten, eta horregatik, LABek bide penari ekin zion. Bada, fiskaltzak Bartzelonako prozesuarekin batzea erabaki du.
Gipuzkoako metalgintzako hitzarmenaren negoziazioa hastear dago, mahaia eratu dute dagoeneko. Itunaren lehenengo bilera izango dute gaur ADEGI patronak eta ELA, LAB, CCOO eta UGT sindikatuek. Sindikatu bakoitzak plataforma bat eratu du, eta batzarrera euren eskaerak eramango dituzte. KPIa bermatzea ezinbestekotzat jotzen dute sindikatu guztiek.
2022ko lan istripuei buruzko txostena aurkeztu du LABek. Iaz 69 pertsona hil ziren Euskal Herrian lanean ari zirela, eta laneko gaixotasunen ondoriozko heriotzak 276 inguru izan direla kalkulatu du sindikatuak. LABek azaldu duenez, heriotzak ekidin zitezkeen oinarrizko prebentzio neurriekin, baina erakunde publikoek eta enpresek borondate urria dutela prebentzioan sakontzeko.
Bizkaiko metalgintzako lan gatazka bideratzeko, bigarrenez bildu dira FVEM eta CCOO, ELA, LAB eta UGT sindikatuak, Jaurlaritza bitartekari dela. Jaurlaritzak alde bakoitzaren eskaerak entzun ondoren, proposamen bat jarri du mahai gainean. Aurrerapausoak egon dira, hala ere, sindikatuen ustez, Jaurlaritzaren eskaintza ez da nahikoa. Hilaren 27an berriro bilduko dira.
CCOO, LAB eta UGT sindikatuek Eusko Jaurlaritzako Lan eta Enplegu Sailari bitartekaritza lanak egiteko eskatu zioten joan den astean. CCOOk, LABek eta UGTk negoziazioarekin eta bitartekaritzarekin jarraitzearen alde egiten dute. ELAk uste du FVEMi dagokiola mugimenduak egitea eta azaroaren 25eko proposamena nabarmen hobetu behar dutela. Nabarmentzen dute mobilizazioak direla lan ituna lortzeko modurik onena.
Markel Olanoren gobernuak argudiatu du bidesarietan jasotakoa beharrezkoa dela lurraldeko errepideak mantentzeko. Bizkaian eta Nafarroan ere ibilgailu astunek autobideak eta bide lasterrak erabiltzeagatik ordaindu beharko dute. Bizkaiko Foru Aldundiak urte hasieran jarri nahi zuen indarrean sistema, baina atzeratu egin du.
2021eko urrian, epaile batzuek diskriminatzailetzat jo zituzten bidesariak, eta Gipuzkoako Aldundiak kobrantza eten behar izan zuen. Hori ikusita, Olanoren gobernuak hirugarren foru-arau bat egin du, aurrekoaren aldean aldaketa batzuk eginez.
