Ekonomia

All Stories

Bizkaiko zahar-etxeetako gatazkan Aldundiaren arduragabetasuna salatu dute ELAk eta LABek

Bizkaiko zahar-etxe pribatueko langileek hirugarren greba eguna dute gaurkoa, LAB eta ELA sindikatuek deitu dute lanuztea. Lan hitzarmenaren negoziazioa blokeatuta dagoela salatzen dute, baita lan gatazka patronalek erakutsitako interes falta ere. Era berean, Bizkaiko Aldundiak ez duela bere gain hartzen berezkoa duen ardura nabarmendu dute sindikatuek, eta, horregatik, inplikazioa eskatu diote.

Lehen sektorea kezkatuta, lehengaien garestitzeak arriskuan jarri duelako beren ekoizpena

Lehen sektorean jarduten duten nekazari eta abeltzainak kezkatuta daude, prezioen gorakadak arriskuan jarri baitu beren ekoizpena. Egoera aztertzeko, nekazaritza, abeltzaintza, arrantza eta basogintza sektoreko ordezkariak Eusko Jaurlaritzarekin bildu dira eta honek iragarri du Elikaduraren Kateko Behatokia sortuko duela. Bien bitartean, EH Bilduk batzorde bat eratzeko proposamena aurkeztu du Legebiltzarrean, egoerari "erantzun bateratua" emateko helburuarekin. Proposamena, ordea, gaur goizean eztabaidatu dute osoko bilkuran, eta aldeko 27 botorekin eta aurkako 47rekin ez da onartu.

EHNE: 'Esne-ekoizleentzat garraiolarien grebak eragin oso kaltegarriak sortu ditzake'

Laugarren eguna dute garraiolariek. Grebaren oihartzuna gero eta handiagoa da eta zenbait sektoretan nabaritzen hasiak dira garraiolarien lanuzteak. Arrantzaleak, esaterako, ez dira astelehenera arte itsasoratuko eta Espainiako esne-industria Federazioak adierazi duenez, jarduera etengo du. EHNEk, bere aldetik, grebaren eragina "oso kaltegarria" izan daitekeela adierazi du.

Garraiolarien grebaren ohiartzuna handitzen doa

Garraiolarien grebak hirugarren eguna du gaurkoa, eta bietan bezala, Bilboko portuan ari da gehien nabaritzen, bertan diharduten garraiolari gehienek grebarekin bat egin baitute. Hala ere, gaurko giroa lasaiagoa izan da, ez baita piketerik egon sarreran. Lan uzteaz gain, gainera, protestak egin dituzte, gaur, Gasteizen egin dute, eta bart, Iruñean. Edonola ere, grebaren oihartzuna handitzen doa, oraindik, patronal handiek ez dute bat egin, baina atzo TransportBilbaoko kide asko gehitu zitzaizkien.

Garraiolarien bigarren greba egunak Bilboko Portuan eta Nafarroan izan du eragina

Bigarren greba eguna dute garraio sektoreko langileek, besteak beste, erregaiaren prezioa jaisten ez bada, ezin dutela biziraun salatzen dute. Hego Euskal Herrian bi elkartek babestu dute Garraioaren Defentsarako Espainiako Plataformak eginiko deialdia: Hiru sindikatuak eta Tradisna Nafarroako garraio sektoreko patronaletako batek. Aurreko jardunaldian bezala, batez ere Bilboko Portuan eta Nafarroan izango du eragina, eta goizean piketeak egin dituzte grebalariek. Horrez gain, 150 bat kamioi Galarretik Iruñera abiatu dira goizean, protesta hiriburuko erdigunera eramateko.

Argindarra, gasa, lehengaiak eta garraioak garestituta eta ekilore olioaren inportazioa etenda

Euskal Herria hasia da nabaritzen Ukrainako gerraren ondorioak. Argindarraren eta gasaren prezioak iazkoekin alderatuta zortzi aldiz biderkatu dira. Energien garestitzeari lehengaien prezioen igoera batu zaie, eta itsasoko garraioa ere ikaragarri garestitu da. Elikagaien sektorean, bestalde, kezkatuta, Ukraina baita ekilore olioaren munduko produktore nagusia, eta gerrak eten egin ditu inportazioak. Testuinguru honetan, jarduna eteten hasi dira zenbait enpresa.

Tradisnak eta Hiruk bat egin dute garraiolarien grebarekin

Prezioen igoeraren adibiderik garbienetako bat da erregaiaren prezioarena. Bada, Hego Euskal Herriko eta Espainiako Estatuko milaka garraiolarik greba mugagabea hasi dute, erregaiaren etengabeko prezio igoera tarteko. Hiru sindikatuak eta Tradisna Nafarroako Garraiolarien Elkarteak bat egin dute Espainiako Garraioaren Defentsarako Plataformak deitutako lanuzte mugagabearekin.

Greenpeacek salatu du Bilboko portutik sartzen den gasak Ukrainako gerra finantzatzen duela

Bilboko portura Errusiako gasa heldu da. Europako Batasunak, oraingoz, ez du debekurik ezarri, baina beste merkatu batzuetatik inportatzea aztertzen ari da, bai hobien bidez, bai gasontzietan. Hori bai, Europako Batasunean Errusiako gasa eta petrolioa inportatzen jarraitzearen kontrako ahotsak ugaritu egin dira azken egunetan. Bada, Greenpeacek protesta-ekintza egin du Errusiatik iritsitako gasontziaren aurrean, ‘Gerrari ez’ eta ‘Gasak gerra finantzatzen du’ lelopean, salatu dute Bilboko portutik sartzen den gasak gerra finantzatzen duela.
hamaika telebista

11 laguntzaile

Image