Frantziako Gobernuaren pentsio erreformaren aurka kalera atera dira berriro gaur Baionan. Argitxu Dufau LAB sindikatuko kideak nabarmendu du mobilizatzen jarraituko dutela, eta ez dutela “amore emango” pentsio erreforma bertan behera utzi arte.
Dufauk azaldu du aste honetan hasi direla testua eztabaidatzen, eta zuzenketa anitz pausatu dituztela. Uste du horrek “denbora” emango diela borroka honi segida emateko, Macronen asmoa delako “indarrean ahal bezain fite paratzea erreforma”. Mobilizatzen jarraitu behar dutela dio, Asanblean ere eztabaida hori bideratu behar dutelako, eta langileok “protagonismo osoa” hartu behar dutelako.

Bizkaiko adinekoen egoitzetako langileak iazko 21 eguneko grebari segida ematen ari dira, eta zazpi eguneko greba egiten ari dira ELA sindikatuak deituta, otsailaren 1ean hasi eta bihar arte.
Ainhoa Tirapu sindikatuko kideak azaldu du patronalak 255 milioi euro jaso dituela, baina langileek ez dutela hobekuntzarik izan lan-baldintzetan. Are gehiago, Tirapuk salatu du gutunak bidali dizkiela erabiltzaileei, 2023. urtearen hasieran kuota igoko dela esanez, eta igoera horren argudioetako bat izan dela negoziazio kolektiboa eta soldaten igoera: “Hori ez da errealitatea; patronala ez da eseri ere egin negoziatzera”.

Iaz, 25.948 kontratu berrikusi zituen Lan Ikuskaritzak: 14.559 aldi baterako kontratuetan dauden iruzurrak atzemateko. Berrikusitako kontratuetatik 8.760 mugagabe bihurtu dituzte enpresek. Aldi baterako kontratazioaren aurkako ekintza plana bigarren fasean dago orain. Orotara, 4.844 gutun bidali ditu ikuskaritzak, 11.389 langileen kontratuei eragiten dietenak. Bigarren ekintza plana kontratazio partzialaren aurkakoa da. Eta oraindik lehenengo fasean dago.

LAB, CCOO, ELA, UGT eta STEILAS sindikatuek legez ezarritako foroetan benetako negoziazioa egiteko deia egin diote Nafarroako Gobernuari. Horretarako, sektore publiko osoan greba deitu dute otsailaren 15erako. Ohar bateratu batean, sindikatuek sektore publikoaren pribatizazioa amaitzea exijitu dute.

Sindikatuek aurkeztutako aldarrikapen nagusiak hauek dira: sektore publikoko pribatizazioa amaitzea eta orain arte pribatizatu dena iraultzea; Nafarroako Gobernuak autogobernu eskumenak erabiltzea; enpleguaren egonkortasuna eta behin-behinekotasuna %8tik behera murriztea; arreta hobetzea, enplegua sortzea eta gazteak kontratatzea; eta, azkenik, prestakuntza eta dedikazioa sustatu eta ordaintzea, soldatak igotzea alegia.

Hiru sindikatu nagusiek adierazi dute ez dutela “eskubideetan atzerapauso bakar bat ere” ikusten Bizkaiko metalgintzako langileentzat. Akordioa urtebete baino gehiagoko lan-gatazkaren ondoren iritsi da, borroka luze baten emaitza da.

Zehazki, Eusko Jaurlaritzak Bizkaiko metalaren 2022-2025 hitzarmenerako egindako proposamenak % 15eko igoera aurreikusten du, KPIren berrikuspen-klausulak, instalazioetako langileentzako subrogazioa eta telefono-lineen eta zuntz optikoaren mantentze-lanak, eta baimen eta lizentzien hasiera lanegunetan, eta jurisprudentziak ezartzen duena baliatzea. Horrez gain, 28.000 eurorainoko hobekuntzak jasotzen ditu istripuagatik ezintasun eta heriotza aseguruetan, LGTBI+ pertsonak jazarpen-protokoloetan sartzea eta norberaren aukerako zortzi ordu, horietatik lau berreskuratu ezin direnak.

Aurrerapauso horrekin jarraipena eman zaio iaz sinatutako hitzarmenari.LAB pozik azaldu da akordioarekin; hala ere, ELA sindikatuaren jarrera salatu dute. Aldarrikapen nagusiena, LABen hitzetan, 19.600 euroko gutxieneko soldata da. Gauzak horrela, 2022tik 2025era doan lan hitzarmena sinatu du LAB sindikatuak.