Euskal Herria

All Stories

Neurriak "eraginkorrak" izaten ari diren arren, birusa transmisio altuko egoeran dago EAEn

Gotzone Sagardui Osasun sailburuaren esanetan, koronabirusari aurre egiteko hartu dituzten neurriak "eraginkorrak" izaten ari dira, eta pandemiaren "joera aldaketa" islatzen dute. Hala ere, Araban, Bizkaian eta Gipuzkoan, koronabirusaren transmisio egoera oso altua da, Osasun sailburuaren esanetan. Horregatik, LABIk azken dekretuan ezarritako neurriei eustea erabaki du, abenduaren 10era arte.

Aitor Esteban EAJko diputatuak iragarri du aurrerapausoak eman direla Espainiako Aurrekontuen negoziazioan

Espainiako aurrekontuek zalaparta sortu dute Euskal Herrian ere. Gobernua kontrolatzeko saioa egin zuten atzo Espainiako Kongresuan, eta 2021erako aurrekontuak izan zituzten hizpide. Aitor Esteban EAJko diputatuak premiazko agerraldi bat egin du iragartzeko, aurrerapausoak eman direla negoziazioan. Lau zuzenketa aipatu ditu zehazki Estebanek: dieselaren zerga kentzea, makina-erremintarentzat 50 milioiko partida bat, Bilbon Zorrotzako trengeltokia lurperatzea eta hezkuntza duala unibertsitatera eramatea. Horrez gain, zalaparta sortu du eskuinean, batez ere, EH Bilduk aurrekontuen osoko zuzenketak egiterako orduan, Sanchezen exekutiboari erakutsi dion babesak. EH Bilduk 29 zuzenketa partzial egin dizkio aurrekontu proposamenari, eta horiek helburu dute sektore publikoa indartzea, eta, besteak beste, krisian dauden sektoreak erdigunera eramatea. Koalizioari, Madrilen, Gasteizen edo Iruñean jarrera desberdina izatea leporatu zaio.

EAEn 1069 kutsatu berri atzeman dituzte, 14.886 test diagnostiko egin ostean

Koronabirus positibo berriek apur bat behera egin arren, EAEn atzo 1069 kutsatu berri atzeman zituzten, 14.886 test diagnostiko egin ostean. Lurraldeka aztertuz, 136 Araban, 432 Bizkaian eta 478 Gipuzkoan. Azpimarratzekoa da, ordea, 100.000 biztanleko 14 eguneko intzidentzia tasa altuena Gipuzkoak duela, 1013ko kopurua baitu. Gabonei begira, datorren astean iragarriko dituzte gomendio zerrendak, eta gaur arratsaldean bilduko da LABI neurriak mantendu edo moldatu behar diren aztertzeko.

Bosgarren egunez jarraian 200 positiboetatik behera kokatu da Nafarroa

Azkeneko 24 orduetan 136 positibo zenbatu dituzten arren positibotasunak ia puntu batean gora egin du eta %6,6koa da. Abuztuaz geroztik lehendabiziko aldiz gertatu da 200 gaixoen azpitik egotea Nafarroako pandemiaren egoera. Atzo 2065 test egin zituzten osotara Osasunbidean.

Maia alkateak adierazi du "ezkorra" dela aurrekontuak onartzeko aukeraz

Enrique Maia Iruñeko alkateak adierazi du "oso ezkorra" dela Udaleko Aurrekontuak onartzeko behar dituen babesa lortzeko aukeraz. Adierazi du beste alderdi politikoek Navarra Sumarekiko harremanak blokeatuta dituztela, akordioen edukia zernahi dela ere. Bestalde, Haur Eskoletako Gurasoak plataformako kideek euskarazko haur eskolak Iruñea iparraldean soilik daudela salatzeko kexak aurkeztuko dituzte Udalean, Arartekoaren txostenean oinarrituta.

Hego Euskal Herriko osasun zerbitzuetan baliabide gehiago behar direla salatu dute

Koronabirusak kezka handia sortu du osasun zerbitzuetan; hain zuzen, baliabide gehiago behar direla salatu dute Hego Euskal Herriko osasun langileek, sindikatuek eta profesionalen elkargoek. Oraintxe, ZIU zaintza intentsiboko unitateetako egoera da kezkagarriena, egunetik egunera ari baitira oheak betetzen.

Koronabirusaren krisiak gogor astindu du, eta hainbat dira uneko lan gatazkak Euskal Herrian

Baionako Monoprix saltegian den Amazonen auto-zerbitzu gunea blokeatu dute momentu batez Bizi!-ko zenbait kidek. Gainera, tokiko saltegiek irekitzeko aukera izan arte halako guneak ixteko galdegin dute. Bestetik, koronabirusaren krisiak gogor astindu du, besteak beste, hegazkingintzaren sektorea, eta, apurka, lanpostu galera areagotzen ari da. Oraingoan, ITP taldea izango da berriro neurriak hartuko dituena Bizkaian dituen beste lantegietan.
hamaika telebista

Image