Bestelakoak izango dira aurtengo Eguberriak. Familia bisitatzeko soilik mugitu ahalko da erkidegoz, propio familia ospakizunetarako. Eta gaueko mugikortasuna Urtezahar gauean eta Gabon gauean 01:30ak arte luzatzea erabaki dute. Familia topaketa horietan, ordea, hamar lagun baino gehiago ez elkartzeko irizpidea eman da, eta bi bizikidetza talde baino gehiago ezingo dira elkartu. Azken orduan jasotako datuei dagokienez, Hego Euskal Herrian 743 positibo berri atzeman dituzte.
Euskal Herria
All Stories
COVID19aren eraginez ospitaleraturik izan ostean eginiko lehen agerraldi publikoan hitz egin du Herri-Harremanetarako kontseilariak, bideo baten bitartez euskararen eguna abenduaren 3 honetan ospatuko dela gogorarazteko.
Arratsaldean da biltzekoa Espainiako Osasuneko Lurralde arteko Kontseilua. Bertan Eguberrietako irizpideak adostu eta ezarriko dituzte. Eusko Jaurlaritza egun berezietako familia ospakizunetan gehienez 10 pertsona elkartzea baimentzearen alde agertu da. Bestalde, azken 24 orduetan jaso diren datuen arabera, EAEn 564 positibo berri atzeman dituzte, 8.938 test diagnostiko egin ostean.
Egun bizi dugun egoera honek bete-betean harrapatu du Euskaraldiaren bigarren edizioa. Era berean, arigune guztiek beraien jarduera normaltasunez ezin garatu izanak eragina izan du; eta Kike Amonarrizek nabarmendu du gune horiek oso garrantzitsuak direla euskararen erabileran urrats handiak emateko.
Hezkuntza komunitateko zenbait kidek Hego Euskal Herriko hainbat auzo eta herri aldarriz josi zituzten asteartean, Hezkuntza Plazara egitasmoa oinarri hartuta. Lan gatazkei helduta, bestaldetik, Bilboko portuko zamaketariek Lan Ministerioaren ibilbide-orria onartu dute. Gainera, hegazkingintzaren sektorea krisiaren jo mugan dago eta hainbat izan dira azken egunetako protestak.
Laugarren egunez jarraian COVID19arengatik 100 gaixo baino gutxiago zenbatu dituzte Osasunbidean, atzokoan 1752 PCR eta Antigeno proba egin ostean. Osotara 62 kutsatu atzeman zituzten atzokoan.
Abenduaren 3a Nafarroaren Eguna da. EH Bilduk eskatu die herritarrei balia dezatela biharko eguna "herri eta komunitate gisa" proiektu kolektiboetan errotzeko. Geroa Baik, bere aldetik, Nafarroaren izaera "integratzailea, anitza eta solidazioa" azpimarratzeko eskatu du.
Langabeziak nabarmen egin du behera azaroan Hego Euskal Herrian. Aisialdia eta bizitza soziala murrizteko neurriek izan dute eragina lan merkatuan. Ohikoa da azaroan langabeziak behera egitea, osotara, 171.963 lagun ageri dira langabe gisa erregistratuta Lanbideren eta Nafar Lansareren bulegoetan, urrian baino 5.416 gutxiago.
Euskaraldiak iraun bitartean, Donostiako Tabakalerako Kutxa Kultur Plazan hainbat mahai inguru antolatu dira. Esaterako, musikariak euskaraz kantatzeko erabakiaz mintzo mahai-ingurua egin zuten, Leire Palacios Kultur eragile eta PuntuEus-eko proiektu arduradunak gidatuz. Eta bertan izan ziren Rafa Rueda, Alex Sardui eta Maria Rivero.
- Eusko Jaurlaritzak Gabonetan gehienez 10 lagun biltzea proposatuko du
- EAEko gazteen %68k "beldurrez" ikusten du etorkizuna pandemiagatik
- Glovoko autonomo faltsuei kotizazioak itzultzeko eskatu du ELAk
- Mikel Zabalza omendu dute asteburuan bere desagertzearen 35. urteurrenean
- Koronabirus joerak hobera egin du, eta EAE eremu gorritik laranjara igaro da
- Azaroan proba gutxien egin dituzten asteburuan 100 positiboetatik behera kokatu da Nafarroa
