EHEk deituta, manifestazio jendetsua izan da Durangon, 'Euskaraz bizitzeko, euskararen errepublika' lelopean. Hainbat herritarrek egin dute bat deialdiarekin, eta bidean, "Euskaraz bizitzeko, independentzia", "Comisiones, UGT, euskararen etsai" leloak oihukatu dituzte, besteak beste.

"Independentzia aldarrikatzeko eta eraikitzeko" deia egin du EHEk, ezinbestekotzat jotzen dutelako hori euskara normalizatzeko eta biziberritzeko: "Oldarraldi politiko-judizialarekin ikusi dugunez, lortutako eskubide asko atzera bota dizkigute; egungo legediek zirrikitu ugari dituzte eta ez dira nahikoa euskaldunon hizkuntza eskubideak bermatzeko", nabarmendu dute.