Gaurko egunarekin grabatu zen 1991 urtean Hertzainak taldearen 'Zuzenean 19.1.91' diskoa. Taldearen musika bidean mugarria izan zen honako lana, eta Euskal Herrian grabatu diren zuzeneko diskoen artean aipatu beharreko lana da. Disko bikoitzaren barnean murgildu gara hiru hamarkada eta gero.
Azken egunotan polemika sortu dute Alberto Garzon Espainiako ministroak egindako adierazpenek. Etxalde erraldoien eredua kritikatu du. Espainiako datuak aintzat hartuz, ia 70.000 txerri ustiategi intentsibo daude Espainian. Horietatik 3.000 inguru makroetxaldeak dira. Proportzionalki mundu osoan txerri gehien dituen herrialdea da Espainia, 32 milioi txerri baino gehiago baitaude eta biztanleria 47 milioikoa da.
Gurean, berriz, Euskal Herrian etxalde handiena Nafarroan Caparroson dago. Guztira 8.000 esne behi daude eta talde ekologistek hainbatetan salatu dute inguruko lurra eta ura kutsatzen ari dela. Testuinguru honetan, Nafarroako Gobernua makroetxaldeen ereduaren kontra azaldu da. Gehienez 1.250 abelburura mugatzeko araudia laster aterako dute Parlamentuan, Caparrosokoa ez handitzeko eta halakorik ez errepikatzeko.
Gipuzkoan kokatzen den Oñatiko Natur Eskolak fase berri bat hasi du, eraikina hiru urtez birgaitzen aritu ondoren. Ingurumena eta honen arazoak ezagutu eta lantzeko aukera zabala eskaintzen dute Oñati eta Aizkorri-Aratz Parke Naturalean egiten dituzten irteerekin zein instalazioetan burututako tailerrekin.
Bonbon beltz antzerki taldeko Dominika Rekalt eta Josune Gorostegi aktoreak 'Harriminak' antzezlana sortzen ari dira Oñatin, Geuretik Sortuak egitasmoaren barnean. Sorkuntza prozesuaz hitz egin digute, eta Udabiltzaren egitasmoaz zein Oñatiko kultur ekosistemaz hitz egin dugu Iñaki Olalde Oñatiko euskara eta kultura zinegotziarekin.
Ehortzitakoak identifikatu eta familiarteko lokalizatzeko ikerketa lana hasi dute Gerediaga elkarteak eta Durango 1936 Kultur elkarteak, Durangoko Udalaren babesarekin. 1937ko martxoaren 31ko erasoan hildako asko hobi komunetan sartu zituzten, eta haien lanari esker, senide batzuek zer gertatu zen jakin ahal izan dute. Izan ere, zenbaitek ez zekiten bere familiartekoa non lurperatu zuten, baina bazekiten bonbardaketan hil zela. Beste batzuek, aldiz, desagertutzat eman zuten senidea, edo frontean hil zela uste zuten.
Lanean jarraitzen dute, eta gaur egun oraindik hilobiak non dauden zehaztu ez badute ere, elkarteek espero dute hurrengo urratsa horiek aurkitzea izatea. Hala ere, bide luzea geratzen zaie ikertzaileei, funtsezko lana baita hildakoen bizi historia ezagutzea memoria duinagoa marrazteko.
