Aiara de Urreta lankidea izan dugu berriemaile Bilbotik, Bizkaiko hiriburuko azken berrien errepasoa egiten; besteak beste, Euskal Herriko pentsiodunen mugimenduaren aldarriak, PCB-ITPren langile batzordearen bilera Jaurlaritzaren industria sailburuarekin bildu ostean eta asteburuan izandako manifestazioa Euskal Eskola Publikoaz Harro! plataformak deituta.

Gaurkoan, Peio Jorajuria Seaskako lehendakaria izan dugu "Gurean Gaur" Magazineko elkarrizketatu nagusia.

Koldo Otamendi Musika Zuzenean saioko aurkezlea gaurko saioaren aurrerapena egin digu; Iker Lauroba musikari donostiarraren azken proiektua ezagutuko dugu, Iker Lauroba&Beste urtaroak. Azken lau urtetan lau diska kaleratu ditu; Negua, Udazkena, Udaberria eta Uda, azken hau 2021ean bertan.

Frogak baliogabetu eta auzipetuak errugabetzeko eskatu du defentsak. 13/13 auziko abokatuek auzitan jarri dituzte CNIren jarduna; gogoratu zuten CNI Espainiako zerbitzu sekretuek egindako entzuketak izan zirela 13/13 auziari abiapuntua eman zion (H)alboka txostenaren oinarria, eta salatu zuten oraindik ez dagoela argituta ez nork ez zer babes legalekin egin zituzten.Gaur bukatuko da epaiketa.

Auzibide honen ebazpenaren aurreikuspenik egin daitekeen eta auzibidearen beraren izaeraz hausnartu du Aitzol Asla abokatuak.

Gaizka Izagirre Gaztezulo aldizkariko zuzendariak telesail berrien gomendio sorta ekarri digu. HBOMAXen estreinaldiarekin batera, 'Starstruck' telesaila gomendatu du. Baita dagoeneko arrakasta handia izaten ari duen 'El tiempo que te doy' telesaila, honako hau Netflixen ikusgai. Hori gutxi balitz, BBCk XXI.mendeko 100telesairik onenen zerrenda argitaratu du eta Izagirreren oniritzia jaso du, gainera.

‘Basoa; defendatzaileon etxea’ proiektua ezagutu dugu Txus Elorza kidearen eskutik; besteak beste, Arratiako eta inguruko aktibismoaren eta jendearen bidegurutzea izatea du helburu.

COP26 Konferentzia dela eta, Euskal Herriko hainbat talde ekologistak eta sindikalek bat egin dute COP26 Aldaketaldia plataforman. Plataformaren eskakizuna argia da ordezkari politikoentzat: hitzetik ekintzetara igarotzea. Hain zuzen, neurrigabeko hazkunde ekonomikoaren bidea geldiaraztea, besteak beste; kapitalismoak berak sortutako arazoa baita krisi klimatikoa, Cañok adierazi duenez, eta kapitalismoaren esku utzi nahi dituzte konponbideak COP26 goi-bileran, salatu duenez.

Jesus Uzkudun Asviamie Euskadiko amiantoaren biktimen elkarteko bozeramaileak azaldu duenez, azaroaren 4an mobilizazioak iragarri dituzte Donostian, Bilbon eta Laudion. Hain zuzen, egun horretan eztabaidatuko dira aurrekontuak Madrilen. Uzkudunek salatu duenez, momentuz ez dago dirurik aurrekontu horietan amiantoaren biktimak konpensatzeko funtsera bideratzeko, nahiz eta apirilean argi berdea eman zitzaion funts horren eraketari. Horixe bera aldarrikatuko dute azaroaren 4an, amiantoa, hiltzaile isila deiturikoa, osasun publikoko arazoa urteetan zehar izan den heinean, biktimen aitortza, justizia eta erreparazioa bilatzeko bidean.