Gure begiz

All Stories

Hibai Etxebarria: "Garai mingotz hauei aurre egiteko diskoa da 'Goxokiak'"

Hibai Etxeberria musikaria elkarrizketatu dugu Hamaika Telebistan. Emanaldia eskainiko du uztailaren 1ean, Aurrera Fest jaialdian, eta Goxokiak diskoa aurkeztuko du bertan. Pandemia garaian ekoitzitako diskoa den arren, abesti alaiak eta dantzagarriak bildu ditu: "Nire filosofia da momentu txarretan aurrera egin behar dela; garai honetara egokitzen diren kantak sortzen saiatu naiz", azaldu du musikariak.

Reyes Carrere: "Udala argazkia bilatzen ari da, baina gauza gutxi egiten ditu bizikidetzarantz"

Reyes Carrere Donostiako EH Bilduko zinegotzia elkarrizketatu dugu Hamaika Telebistan, bizikidetza eta memoria hizpide. Donostiako memoriaren plakekin jarrera baztertzaileak daudela salatu du; zentzu horretan, nabarmendu du Goia "argazkiaren bila" dabilela, eta ez duela "bizikiderantz pausorik ematen".

Koldo Otamendi: "DVDa kaleratu du The Bobby's taldeak, historiarako gelditzen den horietakoa"

Ostegunero legez, Musika Zuzenean saioa emitituko da 21:30ean, eta saioko aurkezle Koldo Otamendirekin hitz egin dugu. Gaurko saioan, The Bobby's talde gipuzkoarra elkarrizketatuko dute, eta beren 10 urteko ibilbidearen errepasoa egin digu. Horrez gain, Ander Pikowski izango da 'Hitz bitan' ataleko protagonista, eta Eraso! taldearen 25.urteurrena ere gogora ekarriko du Otamendik.

Gorka Julio: "Automatizazio prozesuek bizitza duin eta kolektiboak eraikitzeko balio dezakete"

Gorka Julio OlatuKoop-eko kidea elkarrizketatu dugu Hamaika Telebistan, Euskal Herria Digitala manifestua aurkeztu baitute eragile eta norbanako ugarik: sinatzaileen artean daude MRA Fundazioa, Ipar Hegoa, Iratzar Fundazioa, Olatukoop eta IPES, besteak beste.

Juliok azaldu duenez, kapitalismo digitalaren alternatibak pentsatzeko eta eztabaida irekitzeko asmoa du egitasmoak: "Aditu, aritu eta herritarren artean sozializatu eta elkarrekin pentsatzeko sarea sortzea da ekimenaren helburua", azaldu du.

Hainbat alorretan eztabaida piztu nahi dute, azken urteetan gertatzen ari den digitalizazio prozesuaz hausnartzeko. Digitalizazioak lan arloan ekarriko dituen aldaketez, esaterako, Juliok nabarmendu du teknologiak ez duela zertan enpleguaren suntsiketa ekarri; kontrara, nabarmendu du automatizazio prozesuek "bizitza duin eta kolektiboak eraikitzeko" balio dezaketela.

Ixone Retes: "Krisiaz baliatzen ari dira gure eskubideak murrizteko, eta ez dugu onartuko"

Ixone Retes Tubacexeko langilea elkarrizketatu dugu Hamaika Telebistan. Asteazkenean Petronorreko Muskizko findegiko langileak babesten izan dira, greba egiten ari baitira ekainaren 20ra arte langileen herenari eragiten dien lan-erregulazioko espedientea bertan behera utz dezatela exijitzeko.

Bi enpresetako egoera salatu du Retesek, eta nabarmendu du borrokan jarraituko dutela langileen kaleratzak bertan behera utzi arte. Hain zuzen, beste hainbat enpresarekin batera, enplegu duinaren aldeko manifestazioa deitu dute ostiral honetarako, Bilbon.

Vero Satrustegi: "Castillok data sinbolikoan hartuko du kargua Perun, Independentzia Egunean"

Veronica Satrustegi Perun bizi den kazetaria izan dugu Hamaika Telebistan. Hego Amerikako egoera soziopolitikoa aztertu dugu, hainbat herrialdeetako egunerokotasunari helduta. Peruko hauteskundeen ondorena, Txileko eskualdeetako hauteskundeak, Kolonbiako istilu eta hilketak, Nikaraguako oposizioko buruzagi batzuen atxiloketak eta hidrokarburoen prezioaren igoera salatzeko Ekuadorreko indigenek egin dituzten protestak izan ditugu hizpide, besteak beste.

Ugo Mayor: "Optimistak izan behar dugu, baina alerta mantendu behar dugu aldaeren aurrean"

Ugo Mayor Ikerbasqueko ikerlaria elkarrizketatu dugu Hamaika Telebistan. Salatu duenez, birusarekin lanean ari diren ikerlariak ez dituzte txertatu oraindik, eta "ulertezintzat" jo du egoera. Bere esanetan, dekretu batek jasotzen du birusarekin lan egiten dutenei babesa eman beharko litzaiekeela txertoa baldin badago, baina administrazioak esan die adinez tokatzen zaienean jasoko dutela.

Egoera epidemiologikoaz galdetuta, datuek hoberantz egiten duten heinean eta txertaketa geroz eta orokortuagoa den heinean, optimistak izateko arrazoiak badaudela onartu du ikertzaileak, baina aldaeren aurrean "adi" egoteko deia egin du; izan ere, Delta aldaera esaterako, kutsakorragoa dela aipatu du.

hamaika telebista

Image