Gure begiz

All Stories

Asier Blas: 'AEBko biolentziaren normalizazioaren esangura muturrekoak dira tiroketak'

AEBtan, Texasen izandako tiroketak zalaparta sortu du berriro armen inguruan; Joe Bidenek "armen lobby-a" eten behar dela adierazi du. Asier Blas EHUko politika zientzietako zuzendariarekin aztertu dugu biolentzia olde horren atzean zer egon daitekeen.

Horrez gain, Ukrainara begira jarri gara Mariupolgo altzairutegiko soldaduen amore emateak suposatzen duenaz eta soldadu horiek Azov batailoiarekin duten harremanaz aritu da. Suediak eta Finlandiak NATOn sartzeko egindako eskaeraren ondotik etor daitekeenaz ere hausnartu du Blasek.

Vero Satrustegi: 'Jatorrizko herrien aitortza Txileko Konstituzio berriaren zirriborroan da'

Vero Satrustegi kazetariak eman du Kolonbia, Mexiko eta Txileko aktualitatearen berri. Kolonbiako hauteskundeak izango dira igandean; Mexikoko desagerpenei buruzko txosten ofizialaren arabera 100.000 pertsona desagertu dira azken hamarkadetan; eta Txileko Konstituzio berria eratzeko prozesua abian da, dagoeneko zirriborroa prest, historikotzat jotzen dena.

Ane Irazabal: 'Ahots kritikoak isilarazteko ahalegina islatzen du Pablo Gonzalezen atxiloketak'

Ane Irazabalekin aztertu ditugu Ukrainako gerrarekin lotutako berriak; Pablo Gonzalez kazetariaren espetxealdia; Europako Parlamentuak Errusiaren alde ari diren politikari edo agintari ohiak Europako zigorren zerrendan sartzeko eskaera; eta Angela Merkelen figura Putinekin izandako harremanetan.

David Fernández (ANC): 'Aldebakarrez ekin behar diogu, inori baimenik eskatu gabe'

Ehun Mugimenduak antolatuta, solasean ibili ziren Unai Apaolaza eta David Fernández euskal eta katalan errepublikei bide emateko aukerak aztertuz eta orain artekoak hausnartuz. Fernández Kataluniako egoerari buruz mintzatu zaigu Gurean Gaur magazinean.

Generalitateko Gobernuak "akats estrategiko larria" egin duela uste du PSOErekin elkarrizketa mahaia adostuta; jendea "engainatuta" sentitzen dela azaldu du; "Herritarren eta alderdi politikoen kupulen arteko distantzia geroz eta handiagoa da", nabarmendu du. Elkarrizketa mahaiak "Estatu espainolaren zuriketa" eta nazioarteko iritzian "Katalunian arazorik ez dela pentsatzea" ekarri duela salatu du.

Fernándezen arabera, Kataluniako independentzia lortzeko arazo nagusia politikari independentistak dira gaur egun. Kritikatu duenez, "nazionalista espainolek" aurrera eramango luketen neurri eta politikak eramaten ari dira aurrera.

Euskal Herria eta Kataluniaren arteko estrategia amankomunak sortu beharra aldarrikatu du eta independentziarako dauden aukerak goraipatu ditu." Horretarako, azpimarratu du lan egin behar dela, bere ustez aldebakarrez, "baimenik eskatu gabe".

Unai Apaolaza: 'Burujabetza ekintza indartsua eta alaia izango da ekainaren 4koa'

Ehun-ek deitutako lehen burujabetza ekintza masiboa izango da ekainaren 4koa; burujabetza iraultzari hasiera eman nahi diona; Irungo Ficoban izango da, eta herritarrei dei egin die ekitaldira mozorrotuta joateko.

Hitzordua larunbatean iragarri zuen Ehun mugimenduak Donostian egindako ekitaldian; egun berean, David Fernandez ANCko lehendakariodea eta Unai Apaolaza Ehuneko kidearen arteko solasaldia ere antolatu zuten, euskal eta katalan errepublikei buruz hausnartzeko.

Unai Apaolazak berak kontatu dizkigu bertan esandakoak.

Iñigo Aduriz: 'Hileko produktuen BEZa jaistea edo bertan behera uztea ez da lortu'

Bihar onartzekoa du Madrilgo ministroen kontseiluak Osasun Sexualaren Legearen erreforma; honen xehetasunak eta egiteke duen bidea azaldu du Iñigo Aduriz Eldiario.es-eko kazetariak. Pegasus auziari lotuta, Kongresuan 'Estatuko estoldak ikertzeko' batzorde baten eraketaren eskakizunaz, Botere Judizialaren Kontseiluaren berritzeaz eta Segurtasun Nazionaleko Legeaz ere aritu da Iñigo Aduriz Eldiario.es-eko kazetaria.

Angel Elias: 'Oinarrizko errentak aberastasuna banatzea suposatuko luke'

Baldintzarik gabeko Oinarrizko Errentaren proposamena ez da aurrera atera Legebiltzarrean. Angel Elias da ekimenaren sustatzaileetako bat, eta EAJk, PSEk eta espainol eskuinaren aurkako botoak salatu ditu; "herritarron bizi baldintzen alde proposatzen dituenak ez zaizkiela interesatzen erakutsi dute".

Eliasen arabera, beharrezkoa da aberastasuna banatzea eta, horretarako, zerga ssitema aldatu beharra aldarrikatu du. Nahiz eta ekimena Legebiltzarrean aurrera egin ez duen, Eliasek balioan jarri nahi izan du azken hilabeteotan lortutakoa.

Maite Ubiria: 'Frantziako ezkerreko frontea Macronismoaren aurrean kokatu daiteke legegileetan'

Frantziako Asanblada Nazionalerako hauteskundeak izateko bost aste falta direnean, ezkerrak fronte zabal bat eratzeko aurrerapausoak eman ditu. Gaur jakinarazi dutenez, PS Alderdi Sozialista eta PCF Alderdi Komunista ere batu direlako aurretik LFI Frantzia Intsumisoak eta EELV Europa Ekologia-Berdeek egindako akordiora, ultraeskuinak hauteskunde presidentzialetan utzitako argazkiari erantzun nahiean eta Macronen alternatiba gisa aurkeztezko helburuarekin. Ezkerreko alderdien fronte zabalak zabaltzen dituen aukerei buruz aritu da Maite Ubiria kazetaria.

Gorka Julio: 'Datuak ustiatzen dituzten multinazionalak eredu gisa proposatzen dira hezkuntzan'

Lakuako Hezkuntza Sailak bere menpeko diren ikastetxeetan datozen lau urteetan Google Workspace for Education zerbitzua erabiltzeko hitzarmena sinatu du. Gorka Julio garatzailea eta komunikatzailearekin aztertu dugu Lakuak eta Googlek sinatutako hitzarmenak suposatu lezakeena pribatutasunari eta segurtasunari dagokionean.

Zerbitzua doakoa bada ere, irakasle zein ikasleen datuak multinazionalaren esku gelditu daitezke. Juliok azaldu duenez, orain ez bada ere, aurrerago datu horiek guztiak ustiatuko dituztela "jakitun" da Google. Izan ere, datuak dira etorkizun gertu batean balio gehien izango duten baliabideak.

Juliok salatu duenez, Lakuak sinatutako hitzarmen honek hezkuntzan ere teknologia burujabe eta askatzaile bat egiteko aukera zailtzen du, pribatizazioari atea irekiz.

Pegasus espioitza auziaz ere aritu da Julio, eta zibererasoak goi kargudunei afektatzen dienean soilik garrantzia dutela ematen duela kritikatu du.
hamaika telebista

11 laguntzaile

Image