Azken egunotan Astra Zenecaren bigarren dosiaren inguruan sortutako anabasa argitzen saiatu gara Miren Basaras mikrobiologoarekin. Argi utzi nahi izan du garrantzitsuena bi dosi hartzea dela, “dosi bakar batekin ez dadila inor geratu”. Onena bi dosiak txerto berarenak izatea dela azaldu digu, baina beste aukerarik ezean hobe dela bi dosi ezberdin hartzea bakar bat hartuta geratzea baino.
Uda iristear da eta turismoa erakartzeko Covid-19aren aurkako neurriak arintzen ari dira Europa hegoaldeko estatuak. Horien artean aurreratuen doana Italia izan daiteke. Ane Irazabalek bertatik azaldu digunez, “turismo sektorea berpizteko presa handiarekin dabil Italia”. Ez da harritzekoa, kontutan izanda sektoreak lurraldearen BPGren %13a ordezkatzen duela.
Donostialdeko metroaren eraikuntza lanetan aurkitutako azken zuloa dela eta lanak behin behinean geldiarazteko eskaria egin dio Satorralaia elkarteak estatuko itsasertzeko zerbitzuari. Mikel Alvarez Satorralaiako kideak azaldu digu zulo hau agertu izanak zalantzan jartzen duela Euskal Trenbide Sareak azken 10 hilabeteetan egindako lanaren eraginkortasuna, eta gogorarazi digu aldaketarik ezean Jaurlaritzak ekainean berrekin nahi diela lanei.
Xantaia gisa definitu digu Estitxu Garaik erakunde publikoak Astra Zenecaren lehen dosia hartu zuten herritarrei egiten ari direna. Salatu du bigarren dosia Astra Zenecarena edo Pfizerrena hartzeko aukera eman zaien arren, herritarren bizkar utzi dela Astra Zeneca aukeratuz gero immunizazioa bete gabe geratzeko arriskua.
