Jaurlaritzak Gabonen ondoren ezarritako murrizketa berriei buruz hitz egin dugu Estitxu Garairekin. Azaldu digu aurreikusteko modukoa ela Gabonetan neurriak arindu izanak eragin zuzena izango zuela, eta bereziki kritikagarria iruditzen zaiola egoera okertu izanaren ardura erakundeek euren gain hartu nahi ez izatea. Mikel Iruretagoyena Ignacio Iruretagoyenaren semeak Pablo Casadori Twitter bidez esandakoak ere izan ditugu hizpide.

Hamabostean behin ostegunetan egiten dugun moduan Bizkaia aldeko gaurkotasunari erreparatu diogu Alfre Elgezabal Bizkaia Irratiko kazetariarekin. Lehenik eta behin jantoki sozialen egoerari buruz hitz egin dugu eta bizi dugun garaiaren adierazle diren hainbat datu eman dizkigu. Ondoren, tokian tokiko merkatari txikiei laguntzeko asmoz Bizkaiko Foru Aldundiak martxan jarritako Eup! aplikazioari buruz ere hitz egin dugu.

Urriaren 12an Iruñean egindako ekimen bat dela eta Audientzia Nazionaletik pasa beharko duten 12 gazteei buruz hizketan hasi dugu Beñat Zalduarekin urteko azken analisirako tartean. Horrez gain, Arantxa Tapiak sailburuak Subillan gas ustiaketak martxan jartzeko asmoei buruz egindako adierazpenei buruz ere hitz egin dugu.

Gobernu espainiarra osatzen duten bi alderdien artean izaten ari diren talkei buruz hitz egin dugu Iñigo Adurizekin urteko azken kolaborazioan. Maria Jesus Montero eta Pablo Iglesiasek kongresuko pasiloetan izandako eztabaidaz harago, gutxieneko soldatan, etxe kaleratzeen debekuan edo botere judizialaren erreforman izaten ari diren eztabaidei buruz jardun dugu berarekin.

Bateragune auziari buruz hizketan ekin dio Ane Urkirik urteko azken kolaborazioari. Salatu du Estatu espainiarrean badaudela oraindik soberanistak politikaren lehen lerroan ikusi nahi ez dituenik. Horrez gain, datorren urtarrilaren 26rako zaintza sektorean deitutako grebari buruz ere hitz egin digu.

Gaur jakin da Europar Batasunean abenduaren 27an hasiko dela txertatze prozesua. Eguzki Urteagak nabarmendu digu sekulako garrantzia izango duela herritarren artean txertoarekiko konfiantza sortzea, batez ere kontutan izanda txertaketa ez dela derrigorrezkoa izango. Horrez gain, Espainiako Kongresuan gaur onartu duten eutanasiaren legeari buruz ere hitz egin dugu, eta baita enpresa digital erraldoien aurka Europako Batzordeak proposatu dituen neurriei buruz ere.

Iratxe Sorzabal espainiaratzeko euroaginduetako bat atzera bota du Parisko dei auzitegiak. Tortura kasu bat aintzat hartuta justizia frantziarrak euroagindu bat ukatzen duen lehen aldia da. Erabaki honen garrantzia azpimarratu digu Beñat Zalduak. Horrez gain, Madrilgo Kongresuan bihar onartzekoa duten eutanasia legeari buruz ere hitz egin dugu.