Analisia

All Stories

Ane Irazabal: "Italiako hirugarren gobernu teknokrata izango da Draghirena"

Mario Draghiri eman dio azkenean Sergio matarella presidenteak Italian gobernu berri bat eratzeko ardura. Oraindik ikusteko dago ea Draghi parlamentuan behar beste babes lortzeko gai izango ote den, baina zaila dirudi egungo egoeran parlamentuaren gehiengoak Europako Banku Zentraleko presidente ohiaren hautagaitzaren aurka egiteak. Draghiren figurari buruz, eta Italiako egoera politikoari buruz hitz egin dugu Ane Irazabalekin.

Beñat Zaldua: "Ertzaintzaren suposizioetan oinarritu da Zelaia eta Barbadoren aurkako epaia"

Aitor Zelaia eta Galder Barbadoren kasuari buruz hizketan ekin diogu analisiaren tarteari Beñat Zaldua kazetariarekin. Salatu du Ertzaintzaren suposizio eta aurreiritzietan oinarritutako atestatu "surrealista" baten gainean eraiki dela Aitor Zelaia eta Galder Barbadoren aurkako epaiketa. Bestalde, asteburu honetan beteko da urtea Zaldibarko zabortegian luizia izan zenetik. Ordutik hona gertatutakoari buruz eta prozesu judizialaren abiadura motelari buruz hitz egin digu.

Horrez gain, aste honetan jakin dugu 2021ean ere ez dela San Ferminik izango Iruñean. Iruindarra izaki penaz hartu du erabakia Zalduak baina arduraz jokatu behar dela nabarmendu du. Batez ere "ez-San Fermin" kontzeptua erabiltzearen aurka jardun du.

Estitxu Garai: “ Ertzaintzaren ereduei buruzko hausnarketa seria egiteko garaia da”

Ertzaintzari buruz ohi baino gehiago hitz egin behar izan dugu azken aldian. Atzo Barakaldon CCOOko Javi Gómezi sudurra hautsi zion ertzain baten borra kolpea abiapuntutzat hartuta, polizia ereduari buruz hitz egin digu Estitxu Garai EHUko irakasleak. Azaldu digu bere iritziz azken aldian Donostian Ertzaintza bertaratu ondoren sortutako liskarrak erabiltzen ari dela Jaurlaritza, txertoaren banaketan izandako irregulartasunak eta Gotzone Sagardui osasun sailburuaren dimisioa eskatuz oposizioak egindako adierazpenak estaltzeko.

hari berari tiraka, Andoni Ortuzar EAJko EBBko buruak "Mozkor Borroka" terminoa erabiliz egindako adierazpenak ere aztertu dizkigu. Bere esanetan Jeltzaleen presidenteak egindako adierazpenak AEBetan Alt-Right deritzanak erabili ohi duen komunikazio estrategiaren ildotik eginak izango lirateke.

Oihana teyseire: "Frantziako gobernuak konfinamendua ahal bezainbat saihetsi nahi du"

Frantziako Gobernuak mugan kontrol neurriak zorrozteko hartutako erabakiari buruz hitz egin dugu Oihana Teyseire kazetariarekin. Hemendik aurrera PCR bat beharko da Ipar Euskal Herrira igarotzeko. Horrez gain, ostalarien egoerari buruz ere jardun dugu, besteak beste.
hamaika telebista

Image