Futbolari begira ekin diogu asteburuak kiroletan eman duenaren errepasoari Ane urkiri kazetariarekin. Sanse eta Amorebieta bigarren mailara igo dira, baina ezin izan du horixe bera lortu Bilbao Athleticek. Horrez gain eskupilotari buruz, saskibaloiari buruz eta eskubaloiari buruz ere jardun dugu Urkirirekin.

Konstituzio Kontseiluak hizkuntza gutxituen legeari buruz hartutako erabakiaren ondoren euskarazko murgiltze ereduak ze aukera dituen aztertzen saiatu gara Eneritz Zabaleta zuzenbidean doktorearekin. Azaldu digunez Parisek ez ditu eredu hori eskaintzen duten eskolak debekatuko, baina finantzaketa publikoa eten diezaieke.

Ostegunean egingo da Joakin Beltranen hileta elizkizuna Zallan. Jaurlaritzak haren gorpuaren bilaketa lanak bertan behera uzten zituela jakinarazi baino gutxi lehenago egon zen Alfre Elgezabal bere senideekin. Eurentzat albistea golpe oso gogorra izango zela azaldu digu. Nabarmendu du gainera Zaldibarren gertatutakoa ekiditeko nahikoa zela legea betetzearekin.

Bestalde, Bizkaiko Foru Aldundiak aurtengo errenta aitorpenaren kanpainan hartutako erabakiei buruz ere hitz egin digu. Modu presentzialean egiteko aukera bertan behera utzi eta dena sarean egiteko modua jarri zuen martxan Aldundiak, baina adinekoen kexei jaramon egin eta azkenean modu presentzialean egiteko aukera ere jarri dute.

Tabernetako terrazak eta orain arte itxita egon diren denak ireki ahal izan dituzte gaur Ipar Euskal Herrian, 7 hilabeteko itxialdiaren ondoren. Deseskaladako bigarren fasea da gaur indarrean sartu dena. Maite Ubiria kazetariak azaldu digu ordea neurriak berberak izaten ari direla Frantzia osoan, eta horrek kexak ere eragin izan dituela hemengo egoera beste hainbat lekutakoa baino hobea izan arren orain arte itxita jarraitu behar izan dutelako.

Gauzak ondo bidean, Ekainaren 9an pasako da Ipar Euskal herrian deseskaladako hirugarren fasera.