Saioak

All Stories

Euskal Herriko koloreak janzteko eskubidea aldarri

Europako Multikirol txapelketa jaso du Bilbok asteburuan. Juan Martin Elexpuruk Espainiako koloreei uko egin eta bere klubekoekin hartu du parte beteranoen Europako Duatloi Txapelketan. Antxitxika Debagoiena triatloi taldearen elastikoarekin, eta ikurrina eta Nafarroako bandera eskuetan heldu zen helmugara. Europako Duatloi Txapelketan lehiatu zen, 70-74 urteko mailan, eta bosgarren postuan amaitu zuen 11tik.

Gu Ere Bai taldeak keinu bera egitera animatu ditu aste barruan ariko diren euskal kirolariak.

Bestalde, surfean, Europako WSL zirkuituan, Annette Gonzalez-Etxabarri zumaiarra eta Nicolas Paulet biarriztarra izan ziren Bretainiako probako irabazleak. Rankingetan ere buru dira euskal surflariak.

Sokatirako Munduko Txapelketan ere Euskal Selekzioak zilarrezko domina eskuratu du 560 kiloan. Eta Salma Solaun gimnasta gasteiztarrak brontzezko domina errepikatu du Munduko Gimnastika Erritmikoko Txapelketako bost uztaietako finalean. Gainera, ondoren, bosgarren postua lortu du ariketa mistoan, hiru zinta eta bi pilotarekin.

Donostia Saria jaso du Juliette Binoche aktoreak Kursaalean

Donostia Saria jaso du Juliette Binoche (Paris, 1964) aktore frantziarrak, Kursaalean. Isabel Coixeten eskuetatik jaso du saria, Eneko Sagardoik aurkezturiko ekitaldian.

Claire Denis zinemagilearekin egindako hirugarren lana aurkeztu du: 'Avec l 'amour et acharnement'. Claire Denisek Zuzendari Onenaren Urrezko Hartza eskuratu zuen Berlingo joan den zinemaldian. Bide batez, Binoche Zinemaldian lehiatzen den beste film batean ere agertzen da, 'Le Lycéen'.

Aktoreak beste “bidelagun” bat ere gogoratu nahi izan du, isiltasuna. “Nire bidelagun fidelari nahi dizkiot eman eskerrak: isiltasunari”. “Isiltasunik gabe, ez dago hitzik, ez dago izpiriturik, eta isiltasun hori konpartitu dezakezunean aktore batekin, zuzendari batekin, urrezko hari batek dena josten du, eta pelikula bat sortzen”, azaldu du, hunkituta.

Azken hiru hamarkadetako aktore frantziar ospetsuenetako bat bilakatu da. 1980ko hamarkadaren hasieran hasi zuen ibilbidea zinema munduan, eta ordutik, 70etik gora filmetan parte hartu du.
hamaika telebista

11 laguntzaile

Image