Euskal Herriko agenda jai hitzorduez betetzen ari da; horietako bat izan zen aurreko asteburuko Iturramako jaiak, Nafarroan. Bi urteren ondoren berriro ere ospatu dira eta jai batzordeko kidea den Ander Diazek nabarmendu duenez, arrakastatsuak izan dira eta jendearen parte hartzea handia izan da. Larunbatean poliziaren oldarraldia eta atxiloketak salatu dituzte; UPNren politikak jarri dituzte begirunean. Dena den, zapore onarekin gelditu direla azpimarratu nahi izan du Iturramako jai batzordeko kideak.

Musika Zuzenean saioa bueltan da, ostegunero legez. Oraingo honetan euskal reggae eszena ekarriko du lehen lerrora saioak; 'Reggaean jarrai' bilduma aitzakitzat hartuta. PANTX Records kolektiboak bultzatutako lana; 14 euskal musika taldeen eta beste hainbeste kolektiboen parte hartzearekin aurrera egin duena. Euskal Herriko reggae eta ska eszena indartsuaren erakusle gisa definitu du Otamendik.

Bretoieraren aldeko Ar Redadeg lasterketa hasi zen aurreko ostiralean, eta dagoeneko azken txanpan sartu da. Ekhi Erremundegi Berriako kazetariak hurbildu gaitu Korrikaren itxura hartzen duen lasterketa honetara, Euskal Herrian eta Bretainiarren artean dagoen lotura eta elkartasunaren erakusle.

Onintze Oleaga EH Bilduko politika munizipalisten arduradunak udaletatik abiatu daitezkeen politiken aldeko aldarria egin du euskal gizarteak dituen erronka sozial, ekonomiko eta klimatikoen aurrean. Asteburuan antolatu du EH Bilduk lehen Konferentzia Munizipalista Iruñean, nazioarteko ordezkarien parte hartzearekin.

Igor Arroyo LAB sindikatuko idazkari nagusi ondokoa elkarrizketatu dugu Gurean Gaur magazinean.

Gizarteak arlo ekonomiko eta sozialean bizitzen ari den krisiaren aurrean bi aukera daudela nabarmendu du. Alde batetik, gutxi batzuen etekinak areagotzearren desjabetze eta prekarietate politikak ezartzea; eta bestetik, birbanaketa politikak martxan jartzea. Honekin batera, banaketa hirukoitza aplikatzea, alegia, zaintza, enplegua eta ondasuna denon artean banatzea. Etekinak barik bizitzak jarri behar direla erdigunean aldarrikatu du Arroyok; "herri proiektu batetik sistema ekonomiko, sozial eta politikoa antolatu behar da jendeari bizitza duin bat emateko". Horretarako, beharrezkoa ikusten dute Euskal Herrian mobilizazio ziklo bat hastearen beharra.

IPUINA: Rafaelen ajeak.
Rafaelek denda bat zuen, denetarik saltzen zuen denda hartan. Panpinak eta baloiak, kanikak eta partxisak, ...
IKUSI ETA IKASI: Etxean doraiakiak egiten ikasiko dugu.
ABESTIA: Guk euskaraz