BBK Fundazioak Daan Roosegaarde artista holandarraren 'Waterlich' lana ekarri du Euskal Herrira, Bilbora hain zuzen. Uraren indarra eta poesia esperimentatzeko artea eta teknologia uztartzen dituen lana da. Are gehiago, klima-aldaketaren eraginari buruz hausnartzeko eta planetarekin erlazionatzeko dugun modua birpentsatzeko gonbidapen gisa aurkeztu du artistak. 

Sortzaileak zerua argi urdineko ozeano bihurtzen du LED argien, lente optikoen eta programazio-sistema aurreratu baten bidez, eta “uholde birtuala” sortzen du. Horrela, klima-aldaketari aurre egin ezean, ur-mailak zelan igo daitezkeen ikus dezake publikoak. Argi horien azpian, emozioa, hausnarketa eta ingurumen kontzientzia uztartzen dituen esperientzia kolektiboan murgiltzen dira bisitariak, etorkizun posibleak irudikatzera gonbidatuta.