Euskal Udalekuek jasaten ari diren “difamazio kanpaina” salatu dute Gasteizen egindako agerraldi jendetsuan. Haurrak, gurasoak, hezitzaileak, kideak eta hainbat herritar eta eragile bildu dira beren aurkako “kanpaina mediatiko eta politikoa” salatzeko.
Proiektuko kideek azaldu dute hezitzaileek ez dutela jaso salaketa judizialik, eta zehaztu dute jaso dituzten kexa zuzen bakarrak dutxen funtzionamenduagatik izan direla. Hori dela eta, nabarmendu dute ikasturte osoan udalekuak prestatzen aritu direla begiraleak.
Arabako Foru Aldundia “zapaltzailetzat” eta “mafiosotzat” jo dute eta adierazi dute Bernedon udalekua ez egiteko erabakiak “izaera politikoa” duela, eta ez dituela haurrak kontuan hartzen. Era berean, salatu dute Nafarroako Gobernuarengandik presioa jasaten ari direla.
Agerraldian azaldu dutenez, abuztuaren 29an jaialdia ospatuko dute Bernedon udalekuei babesa adierazteko, eta azken hilabeteetan jasandako eraso politikoei eta administratiboei erantzuteko.
Egun osoko egitaraua prestatzen ari dira aisialdi alternatiboaren “ahalmen eraldatzailea” aldarrikatzeko: jolasak, emanaldiak eta bestelako ekitaldiak antolatuko dituzte eta urte hauetan guztietan udalekuetan parte hartu duten familia, gazte, herritar eta proiektuarekin bat egiten duen eragile oro gonbidatu dituzte.
Familia, herritar, haur, hezitzaile, eragile eta norbanako guztiei eskerrak eman dizkiete “haien babesagatik jarraitzen dutelako mimoz eta ilusioz euskara, feminismoa eta auzolana erdigunean jartzen dituen aisialdi proiektu hau indartzen eta eraberritzen”.