Skip to main content

Bideoteka

Bideotekan bilatu
bideoaren irudia
Liburubila, klik bakarrean kultura eskura izateko ataria

2018-07-12

Duela urtebete ekin zioten proiektua garatzeari, eta Finlandian sustatutako antzeko ekimen bat izan dute eredu. Zerbitzuaren doakotasuna nabarmendu dute, edozein herritarrentzat eskuragarri egotea baita helburua. Horrez gain, bilaketa “irakurlearen baldintzetara egokitzeko” aukera dagoela adierazi du Aizpuruk. Bilaketa zehatzak ahalbidetzen ditu, kultura kontsumoa erraztuz.

Klik bakarrean kultura eskura izatea da atari digitalaren helburua, kultura eskaintza zabala webgune bakarrean batzea. Euskadiko Irakurketa Sare Publikoa osatzen duten 500 liburutegiekin eta eLiburutegiarekin lotua dago Liburubila, eskaintza fisikoa zein digitala ahalbidetuz. Jada martxan da Liburubila, edozein herritarrentzat eskuragai.

Zerbitzuaren doakotasunarekin batera, egile eskubideen garrantzia azpimarratu nahi izan dute. Izan ere, herritarrentzat kosturik izango ez duen arren, Jaurlaritzak dagozkien ordainketak egingo dizkie sortzaileei. Horrez gain, filmak estreinatu eta urtebetera izango ditu eskuragarri erabiltzaileak, ekoizpen etxeekin izan ditzaketen konpetentzia arazoak ekiditeko.

bideoaren irudia
Ehun preso inguru "berehala askatzeko" eskatu dute mediku eta abokatuek

2018-07-12

Preso dauden pertsonen egoera beti da saila, eta  Euskal preso politikoena are gehiago , pairatzen duten salbuespen legediagatik. Egoera honi  gehitzen badigu osasun arazoak  are gogorrago bihurtzen da espetxe barruko egonaldia.

Egoera hau egiaztatzera etorri dira Mati Iturralde eta Miren Arana medikuek eta Iñaki Zugadi eta Haizea Ziluaga abokatuek.  Espetxeak ez direla gaixotasunak diagnostikatzeko ezta tratatzeko leku egokiak eta ehun preso inguru "berehala askatzeko" beharra azpimarratu dute.

bideoaren irudia
Diru publikoa bidegabe erabiltzeagatik onartu du Alemaniak Puigdemonten estradizioa

2018-07-12

Schleswig-Holstein landerreko Lurralde Auzitegiak hartu du Carles Puigdemont espainiaratzeko erabakia. Auzitegiak ez du Kataluniako presidenteordearen kontrako kautelazko neurririk agindu, eta Puigdemontek aske jarraitzen du. Espainiako Auzitegi Gorenak Puigdemonten entrega baztertzeko aukera du, eta litekeena da Pablo Llarena instrukzio magistratuak hala egitea, Kataluniako presidente ohiari soilik diru publikoaren erabilera bidegabea leporatzen diolako.

Izan ere, Llarena kontraesan nabarmenean eroriko litzateke Puigdemonti delitu hori bakarrik leporatzea onartuko balu, kontuan izanik Kataluniako prozesu subiranistan Puigdemontek baino ardura apalagoak izan dituzten auzipetuei delitu larriagoak leporatu dizkiela: matxinada eta desobedientzia, hain zuzen.

Gorenak Alemaniako Justiziaren espainiaratzea ontzat emanez gero, Puigdemonti sei urteko kartzela zigorra ezarri ahalko lioke gehienez ere, eta hamar urtetarako kargu publikoetarako ezgaitu. Aldiz, matxinada delituagatik kondetatutakoek 25 urtera arteko zigorra jaso dezakete.

Quim Torra Kataluniako presidenteak Twitter bidez adierazi du "albiste oso ona" dela Alemaniako Justiziaren erabakia. Oso pozik dagoela Puigdemontengatik eta sekula hasi behar ez zuen auzi baten amarru eta gezurrak agerian gelditu direlako beste behin. Europan irabaziko dutela uste du Torrak.

Puigdemont martxoaren 25ean atxilotu zuen Alemaniako poliziak, herrialdearen eta Danimarkaren arteko mugan. Haren kontrako euroagindua eman zuen Espainiako Auzitegi Gorenak. Schleswig-Holsteingo Lurralde Auzitegiak behin-behinean aske utzi apirilaren 5ean, entrega eskaria aztertu bitartean.

Goreneko magistratu Llarenak matxinada delitua leporatu zien Puigdemonti eta beste hamabi buruzagi independentistari. Auzipetze autoan ziurtatu zuen boterearen erabilera "bidegabea" egin zutela "altxamendu" bat bultzatzeko, "armarik gabe", baina indarkeria erabiliz. Alemaniako Justiziak, Espainiakoak ez bezala, ez du nahikoa arrazoi ikusi Pugdemonti matxinada delitua leporatzeko.

bideoaren irudia
Uztailak 11

2018-07-11

 Mundu osoan dira ezagunak sanferminak eta txoko guztietatik gerturatzen dira urtero Iruñera. Hala ere, hemendik at irudi jakin bat dute sanferminek, benetako jaien oso ezberdina dena. Sanferminetara etortzen direnen kanpotarrei buruz gehiago ezagutu nahi izan dugu gaurko saioan.

Bestalde, gaur haurren eguna izanik, erraldoi eta buruhandien konpartsarekin ibili gara Iruñeko alde zaharreko kaleetan zehar. Brontze peñak egiten duen emakume aitzindarien sari ematean ere egon gara. Eta gaur gauean izanen den su artifizialen lehiaketako protagonisten eskutik suen prestaketen berri emanen dizuegu.

bideoaren irudia
Parisen hizkuntza gutxituen aurkako "gurutzada" salatzeko mobilizazioa, larunbatean, Bilbon

2018-07-11

Frantziako Festa Nazionalaren egunean, Parisko Hezkuntza Ministerioak hizkuntza gutxituen kontrako “gurutzada” hasi izana salatuko dute Bilbon, Frantziako Kontsulatuaren aurrean. Ikastolen Elkarteak deituta egingo da elkarretaratzea, Ipar Euskal Herrian brebeta euskaraz egin ahal izatea eta Seaskari irakasle postu gehiago ematea eskatzeko. Ipar Euskal Herrian egin dituzte mobilizazioak, eta Hegoaldean ere egitea garrantzitsua iruditu zaie ikastolei

bideoaren irudia
Joseba Barandiaranen hilketa argitzeko eskatu dute senideek, 40. urtemugan

2018-07-11

German Rodriguezen hilketaren harira deitutako greba orokorrak babes handia izan zuen, eta barrikadek ixten zituzten Gipuzkoako hiriburuko kaleetako batzuk. Horietako batean zegoen Barandiaran Astigarragako gaztea, San Bartolome kalean. Polizia tiroka hasi zen, eta hil egin zuten. 1978ko uztailaren 11n, eta 19 urte zituela.

Zabaldu zen bertsio ofiziala, Gobernu Zibilarena, eguerdirako; manifestariek armak zeramatzatela eta horiekin eraso zietela poliziei, eta poliziek «liskarren aurkako materiala» erabili zutela. Are, erantsi zuten aurrekariak zituela Barandiaranek. Lekukoek, ordea, gezurtatu egin zuten egunean bertan.

Berehala zabaldu zen gertatutakoa, jada bero zegoen giroa are gehiago gaiztotu zuen Barandiaranen hilketak. Istiluak ugaritu ziren. Donostian, 10.000 lagun baino gehiago elkartu ziren hilketaren aurka protesta egiteko manifestazioan, eta jendetza batu zen ere Astigarragan, Barandiaranen hiletan.

Donostiako Instrukzio Auzitegiak ikerketa bat zabaldu zuen, eta ondorioztatu Barandiaran hil zuen bala polizia baten armatik irten zela. Hala ere, ez ziren gai izan tiro egin zuena identifikatzeko. 1985eko uztailean, behin-behinean artxibatu zuten auzia. Barandiaranen familiak uste du Iruñeko Udala «indar handiarekin» ari dela German Rodriguezen hilketa argitzeko bidean pausoak eman nahian, eta hori bera eskatzen du haien senidearen hilketaren auzian.

Beraz, Rodriguezen hilketaren urteurrenarekin batera, lau hamarkada bete dira Barandiaran hil zutenetik. Lore eskaintza egin diote Astigarragan eta ekitaldian parte hartu dute Rodriguezen senideek, Sabino Kuadra diputatu ohiak eta Iruñeko peñen ordezkaritza batek, besteak beste.